Ku viktoria ayera kontra Jamaica:
WILLEMSTAD.- Ayera selekshon di Kòrsou a dal un stap importante, den nan meta pa yega Mundial. Esaki ora nan a derota Jamaica ku skor di 2-0
Selekshon di Kòrsou for di komienso di wega tabatin mihó parti di e wega. E selekshon nashonal tabatin mas di e bala, mientras Jamaica tabata purba uza bala largu.
Kòrsou a habri e skor ku un gol di Livano Comenencia na di 14 minüt.
Despues di esaki Jamaica a kuminsá drenta e wega, i e último 15 minüt tabata di e selekshon hamaikino.
Jamaica a kasi skor den parti final di e promé tempu, pero Juriën Gaari ta salba e gol ora e ta saka e bala for di riba liña.
Wega a bai sosegá ku Kòrsou gana 1-0.
Di dos tempu a kuminsá ku Kenji Gorré remplasando Sontje Hansen.
E kambio aki a resultá klave, mirando ku na di 68 minüt Kenji a skor pa hasi e wega 2-0.
No opstante nan tabata pèrdí, Jamaica a sigui preshoná. Eloy Room a sa di trese salbashon na múltiple okashon den parti final, pa asina tene e gol di Kòrsou.
Na di 90 minüt Jamaica a kere ku nan a kòrta e bentaha, pero rèfri a bai VAR i anulá esaki.
Asina Kòrsou a mantené nan bentaha, pa asina logra e viktoria importante aki.
Armando Obispo a impreshoná den su debut pa selekshon di Kòrsou.
Leandro Bacuna no opstante un leshon,
Despues di wega Advovaat a splika ku tabata un wega difísil,pero ku nan a kuminsá hopi bon. E entrenadó a trese dilanti ku nan a pèrdè kontrol di e wega, pero ku e gol di Kenji a disidí e partido.
Kenji Gorré despues di wega a bisa ku e ta hopi kontentu di kontribuí na e viktoria. Pa Gorré selekshon fi Kòrsou ta un famia ‘Awor aki nos ta serka di nos soño den nòmber di Dios,’ Gorré a bisa.
Livano Comenencia ta hopi kontentu di a skor su promé gol pa Kòrsou den e wega importante aki.
Comenencia semper tabata sa ku e lo bin hunga pa Kòrsou.
‘Nunka ma duda pa skohe pa Kòrsou, e laso entre nos komo hungadó ta fuerte’, Comenencia a bisa.
