NAIROBI, KENIA, AP.- Korte Supremo di Kenia a anulá reelekshon di presidente Uhuru Kenyatta, sitando iregularidatnan den elekshon luna pasá. E tribunal a pidi pa elekshon di nobo dentro di 60 dia. E desishon aki a sorprendé e pais ku ya a prepará pa protestanan nobo di oposishon.
Esaki ta promé biaha den historia ku e resultado di elekshon presidensial den sentro ekonómiko di Afrika Oriental ta wòrdu anulá. Partidarionan di oposishon a baila riba kaya, sorprendé pa e kaida di Kenyatta, yu di e promé presidente di e pais. Tabatin un rivalidat largu entre e famianan polítiko prinsipal di e nashon.
“Esaki ta un dia históriko pa pueblo di Kenia i pa e ekstenshon pa e pueblo di Afrika”, asina e rival di Kenyatta, Raila Odinga a bisa. “Pa promé biaha den historia di demokratisashon afrikano, un tribunal a dikta un sentensia pa anulá e elekshon iregular di un presidente”.
Kenyatta a bisa ku ounke e ta respetá e desishon “personalmente mi no ta di akuerdo”. El a pidi mas kalma den e pais, ku tabatin un historia di violensia despues di elekshon.
E tribunal di seis hues a aprobá e petishon ku 4-2. E opositor denunsia ku e resultadonan di votashon a wòrdu di hack i manipulá na fabor di Kenyatta, kende a haña reelekshon pa un segundo mandato ku 54% di voto.
Segun resultadonan ofisial, Kenyatta a haña 54% di voto i Odinga 44%.