Korte a ekspropiá 283.140 florin for di notario Kleinmoedig

WILLEMSTAD. – Ayera Korte den Apelashon a bai di akuerdo pa ekspropiá NAF 283.140 for di e notario Johny Kleinmoedig. Esaki despues ku Ministerio Públiko, a pidi pa ekspropiá 1.452 mion for di dje. E akusado a apelá e sentensia di Korte den Promé Instansia pa motibu ku e ta insistí ku e suma aki no ta kuadra.

Segun Abogado General e akusado a malversá un kantidat di plaka ku e no tabatin derecho riba dje.

Esaki ta hib’é na e konklushon ku e suma total mester ser konsiderá un benefisio optené ilegalmente.

Banda di esaki, e no tabata paga impuesto. Korte den promé instansia a haña probá ku den e periodo di 28 di desèmber 2009 te ku 25 di aprel 2019 komo ámtenar intenshonalmente el a malversá ANG 1.000.000, ANG 250.000, ANG 128.500, ANG 67.500 i ANG 6.000.  Ta trata di mas ku 1.4 mion florin di su klientenan di Notariskantoor Kleinmoedig i òf Kleinmoedig & Naaldijk  i òf plaka di  fondo di tersera, ku ta e plaka ku gastunan di e klientenan, mester a keda pagá.

Den nan desishon e tribunal ta konkluí ku no tin pruebanan konkreto pa por motivá ku tabatin malversashon manera Mini sterio Públiko ta akusá e notario. Esaki ta pone ku korte no por djis kalkulá un suma. Pero a base di rapòrt di Stichting Belastingaccountantsbureau nan por konkluí ku plaknan malversá ta 19,5% di 1.4 mion florin. Esaki ta yega na un suma di 283.140,00 florin.