WASHINGTON, USA (AFP).- Korte Supremo di Merka, di mayoria konservador, a anulá e kondena na morto imponé riba un hòmber di Oklahoma i a duna instrukshon pa un kaso nobo, den un desishon apoyá pa ministerio publiká i e defensa.
Richard Glossep, di 62 aña, na dos okashon a keda deklará kulpabel di a ordená e asesinato di Barry van Treese den 1997. Ta trata di doño di un motèl i e deklarashon di kulpabel ta basá riba testimonio di un solo hòmber, e asesino Justin Sneed.
E kaso dje hòmber aki kende a pasa kasi 25 aña den sèl wardando riba su morto, a generá hopi petishon di klemensia i esaki inkluso di papa Francisco i di un grupo di hendenan famoso, entre kua e multimionario britániko Richard Branson i streanan di Hollywood Mark Rufalo i Susan Sarandon.
Korte Supremo den luna di òktober a skucha e argumentonan dje kaso i e mayoria dje nuebe huesnan a anulá e kondena di Glossep i a referí na negligensia di ministerio públiko i duda den kredibilidat dje testigu klave.
E promé kondena di Glossep, den 1989, a keda anulá debí na mal trabou di su abogado, pero el a keda husgá di nobo den 2004 i un biaha mas a deklar’é kulpabel.
E kaso a bolbe bai korte máksimo despues ku e fiskal general di Oklahoma, den un intervenshon no usual, a pidi un kaso nobo, refiriendo na ”fayonan grave” di parti di fiskalnan ku a ku a skonde pruebanan.
