RIO DE JANEIRO, AP.- Di dos korte di rango mas haltu na Brasil a redusí e sentensia di eks presidente Luis Inacio Lula da Silva di 12 aña i un luna pa ocho aña i 10 luna.
Tribunal Superior di Hustisia a emití e desishon konforme solisitut di Lula su abogadonan, kende a pidi pa anulá e kondena pa korupshon di e eks mandatario òf redusí su sentensia. E kuater huesnan di e seshon a vota di forma unánime na fabor di redusí e sentensia.
Lula a wòrdu kondená pa korupshon i labamentu di plaka. Fiskal ta sigurá ku e eks presidente a haña un apartamentu dilanti di laman komo opsekio di un kompania di konstrukshon a kambio di haña kontraktnan lukrativo di gobièrnu. E eks mandatario a drenta prizòn den aprel 2018.
Lula ta afirmá ku e ta inosente i a bisa ku e lo sigui apelá den tribunalnan superior.
