WILLEMSTAD. – Dia 29 di mei di aña pasá pa mas o ménos 7 or di mainta na Bramentuin den Rotterdam-IJsselmonde, famianan di e víktima Merwin Frans (30) a spièrta for di soño pa zonidonan di arma di kandela. E famia a kore sali kas pa wak kiko ta pasando i a topa ku nan miembro di famia drumí abou den un plas di sanger i ainda sanger tabata pusha bin afó for di su kabes i tabata hala su último rosea. Un senario ku Korte di Rotterdam a deskribí komo un eksperensia traumátiko i kruel pa e famia. E loke ku e famia a eksperensiá, nunka mas nan lo lubidá i e doló ku e asesinonan a kousa na e famia ta grandi.

E kaso aki a keda tratá riba dianan 11 di mart 2021 i 9 di aprel 2021 i djabièrnè 30 di aprel 2021 Korte di Rotterdam a dikta sentensia di respektivamente 17 i 18 aña kastigu di prizòn.

Konforme e veredikto di 22 página pa kada akusado, por dedusí ku e investigashon tabata rápido i por a arestá e dos sospechosonan hopi lihé.

Tabata testigunan ku a mira kiko a pasa i ku a notifiká polis di e tipo di outo i number di outo ku polis a kuminsá mesora ku nan investigashon.

A sali na kla ku e asesinonan a hui den un ‘van’ Volkswagen Transporter. Polis a haña sa ku e outo aki tabata hòrtá i rápidamente por a “trace” e outo. A topa ku e Volskwagen i informashon ku a drenta na polis ta ku e hendenan a drenta den un outo di famia Renualt Megane. Polis ta topa ku e outo riba kaya i a start un persekushon peligroso i e Renault ta aksidentá, pero e dos personanan den e outo ta baha i kore bai. Polis a bai nan tras i a logra arestá nan.

A haña yabi di e Volkswagen den saku di un di e sospechosonan i den e Volkswagen a haña kapushon i hopi otro kos ku a keda usá momentu di e tiroteo. Den e Renault a haña arma di kandela, ku lachi blo bashí.

Investigashonnan riba paña i yasnan ku a haña den nan poder, hanskun, mea pa tapa kara etcetera, polis a lokalisá polvo di e arma di kandela riba e pañanan i hanskun i tambe riba nan man a haña polvo di e arma di kandela.

E loke ku a sali for di e investigashon, t’asina ku e asesinonan tabata stashoná for di 5.15 di mainta wardando e víktima yega.

Ora el a baha for di outo den kareda di 7 or di mainta, nan ta baha i a likidá Merwin. Polis a konta 20 perforashon di bala na kabes di e víktima i a haña 40 huls na e sitio di e krímen.

Esaki ta motibu ku hues a konkluí ku e òrdu ku e dos asesinonan a haña, tabata ku Merwin no tin mag di skapa. Esaki ta asesinato premeditá. Korte a konsiderá e krímen aki un horendo, pa e echo ku esaki a tuma lugá di dia kla, mei mei di un bario, lagando e víktima abou den un kondishon hororoso atras i pa tur hende ku a sali pa wak kiko ta pasando topa un  situashon kruel.

Fiskal a pidi kastigu di prizòn respektivamente 20 i 14 aña, pero Korte a yega na 17 i 18 aña prizòn.

Na total 8 persona miembronan di famia ku a eksperensiá e situashon troumátiko a ‘claim’ daño i perhuisio, manera plaka pa e shòk ku nan a pasa aden, plaka pa daño material manera gastunan hasí pa trese e kurpa pa entiero Kòrsou i otro claimnan pa afekto.

Kotte a honra 7 di e persona ku a apelá riba daño ku a yega na un suma di 181.032 euro. E suma aki ta bin riba kada veredikto di Korte.

LAGA UN KOMENTARIO

Please enter your comment!
Please enter your name here