HOUSTON.-Un wes den korte federal na Merka a rechasá e demanda di un grupo di trahadó di e hospital Houston Methodist, ku a ninga di tuma e bakuna anti Covid-19. Esaki ta bira e promé kaso ku korte federal a duna un veredikto pa loke ta trata e obligashon òf no pa tuma bakuna. Tur kos ta indiká ku e veredikto aki lo tin konsekuensianan mas aya den hinter e nashon.
Houston Methodist ta e promé hospital ku a kuminsá eksigí di tur su personal pa tuma e bakuna kontra Covid. Segun e wes federal Lynn N. Hughes leinan federal no ta prohibí empleadonan pa ehekutá e mandato ei.
Despues di vários luna di atvertensia e hospital pone mas ku 170 di su 26.000 empleadonan riba non aktief sin pago di salario. Ademas a informa e trahadónan aki ku si nan no bakuna promé ku 21 di yüni próksimo lo duna nan retiro. E hospital a kuminsá mustra ku nan ta hopi serio di nan intenshonnan i ya kaba a duna retiro na e direktor di riesgo i tambe un otro manager na aprel último na momentu ku esakinan no a kumpli ku e deadline ku a pone pa hefenan.
Algun otro hospital den e pais tambe a sigui mesun liña di Houston Methodist, manera University òf Pennsylvania, University òf Louisville, New York Presbyterian and algun hospital grandi mas den e área di Washington D.C.
E CEO di Houston Methodist ta kere ku hopi hospital mas lo sigui e ruta aki pasobra ta konosí ki tin basta empleado tabata pendiente un klarifikashon den korte promé ku nan tuma akshon di bai bakuna òf no. Segun e direktor, ku e veredikto aki den man nan por sigui konsentrá nan focus riba seguridat, kalidat i inovashon den servisio.
117 empleado a kuminsá e kaso kontra di Houston Methodist i nan tabata bou di guia di un enfermera, kende a splika ku nan a ninga e bakuna pasobra nan ta haña ku e ta un eksperimento i tambe e ta peligroso. Wes a bari esaki for di mesa indikando ku e ponensia ei ta falsu.
