Balentina tabata den prizon kondená pa komportashon no apropiá ku mucha i hende muhé
WILLEMSTAD.- Un sentensia di korte di hustisia ta dikta ku e edifisio konosí komo Misa di Pastor Balentina na Groot Kwartier ta haña un doño nobo. Den e kaso aki korte a dikta ku Gi-Ro Settlement Holding ta bira doño di e edifisio aki.
E kaso a kuminsá hunga na momentu ku Curaçao Radio Station(CRS) i Hit 100.3 ku ta doño original di e edifisio a kuminsá eksigí pago na Fundashon Iglesia Lluvia de Bendicion Curaçao. E presidente ta sra. X.C Balentina-Verplaats. E presidente anterior ta sr. O.I.Balentina, konosí komo pastor Balentina. O. Balentina tabata será den prizon despues ku el a haña kondena pa komportashon no apropiá ku mucha i hende muhé den e misa na Groot Kwartier. Entretantu e pastor ta den libertat.
CRS i Hit 100.3 di sr. E.Cijntje tin un debe na balor di 1.4 mion na Gi-Ro Settlement. CRS i Hit 100.3 tabata atendé ku Fundashon Iglesia Lluvia de Bendicion Curaçao pa nan kumpli ku pago di hür di e edifisio i tambe di e uso di frekuensia di radio pa nan transmishonnan. E fundashon mester a paga 12.500 florin pa luna pa algun ora i despues e suma a bira 13.000 pa luna pa 24 ora di transmishon. Sinembargo e fundashon no tabata kumpli kompletamente ku pago i debe a akumulá i yega mas ku 900 mil florin.
Cijntje a hasi traspaso di loke fundashon debe Hit 100.3 na Gi-Ro Settlement pa kubri su debe. Esei a enserá finalmente e tereno tambe na Groot Kwartier. Gi-Ro a eksigí pago di e suma na e fundashon pero esakinan no a kumpli. Asina a resultá ku Gi-Ro Settlement, den korte, a bira doño di e edifisio di pastor Balentina, esta e edifisio di misa di Balentina na Groot Kwartier. Detayenan mas profundo den edishon di EXTRA.
 di pastor Balentin){kind=link}