WASHINGTON, MERKA, AFP.- Korte supremo di Merka a blòkia e desishon di presidente Joe Biden, di imponé vakuna anticovid den empresanan di mas di 100 empleado, loke ta nifiká un sla duru pa e esfuerso di e lider demókrata.
Pero si korte a bai di akuerdo ku e obligashon di vakunashon pa empleadonan di institutonan di salubridat ku ta dependé di fondonan federal.
E seis wesnan konservadó di korte a vota kontra di e inisiativa anunsiá pa Biden na semper pa vakuna òf tèst di COVID semanal bira obligatorio den empresanan grandi. Miéntras ku e tres liberalnan tin otro opinion.
Pa loke ta e obligashon di vakuna serka empleadonan di salubridat, esei a keda aprobá 5-4, kaminda e wesnan konservadó John Roberts i Brett Kavanaugh a vota huntu ku e tresnan liberal.
Biden mas lat a bisa di a keda desepshoná ku e desishon di korte supremo kontra vakunashon anticovid obligatorio.
