WASHINGTON, MERKA, AFP.- Un voto históriko di korte Supremo di Merka a dera derechi pa hasi aborto i un kantidat di estado a probechá di esaki pa prohibí interupshonnan di embaraso den nan teritorio.
Presidente Joe Biden a bisa ku e desishon ta un “eror trágiko” ku ta “pone salubridat i bida di muhénan na peliger” i a pidi e merikanonan pa defendé e derechi aki den elekshonnan ku lo tuma lugá den novèmber.
Klínikanan di Missouri, South Dakota i Georgia ku ta praktiká aborto a sera nan portanan, pero estadonan demókrata manera California i New York a komprometé na defendé akseso na interupshon di embaraso.
E desishon ta kontra inisiativanan internashonal pa liberalisá aborto, ku avansenan den paisnan manera Irlanda, Argentina, Mexico i Colombia.
Vários mandatario, inkluyendo promé minister britániko Boris Johnson i premier kanades Justin Trudeau, a deplorá e desishon di Merka.
Segun Instituto Guttmacher, un sentro di investigashon ku ta hasi kampaña pa akseso na antikonsepshon i aborto rònt mundu, mayoria estado lo prohibí aborto.
Den un parti di e pais, muhénan ku ke interumpí nan embaraso ta wòrdu obligá pa kontinuá ku esaki, traha sitanan klandestino, por ehèmpel dor di kumpra píldoranan di aborto riba internèt òf biaha pa otro estadonan kaminda ainda aborto ta legal.
