WASHINGTON, AP.- Korte Supremo di Merka a sentensiá ku un sobreviviente i famianan di e víktimanan di e masakre na skol básiko Sandy Hook, por demandá fabrikante di e arma ku a keda usá pa mata 26 persona.
E huesnan a rechasá e argumento di empresa Remington Arms, indikando ku e kompania tin protekshon di un lei di 2005 ku ta kanselá mayoria demanda kontra fabrikantenan di arma na momentu ku nan produkto ser usá pa kometé un delito.
Partidarionan tantu di kontròl di arma komo esnan na fabor pa karga arma i fabrikantenan den e pais kompleto ta siguiendo e kaso ku hopi atenshon, pasó esaki lo habri porta pa víktimanan demandá fabrikantenan di arma apesar di e lei federal.
Sobreviviente i famianan di e nuebe víktimanan di e matansa na e skol na Newton riba 14 di desèmber 2012, a inisiá e demanda den un korte estatal na Connecticut.
Segun e demanda, e empresa ku sede na Madison, North Carolina, no mester pone armanan peligroso na disposishon di e públiko. Adam Lanza a usa un Bushmaster AR-15 pa maskará 20 alumno i seis dosente. Lanza tabatin 20 aña na momentu di e masakre.
E famianan a pidi deklarashon di e abogado di Remington Arms.
Lanza a mata su mama na nan kas na Newton promé ku el a ehekutá e atake na Sandy Hook. E arma tabata pertenesé legalmente na su mama.
