NEW YORK, MERKA, AFP.- Hustisia di New York a eksonerá dos hòmber djaweps, kondená pa asesinato di e aktivista popular Malcom X na aña 1965.
Hues di Tribunal Supremo di New York, Ellen Biben, a anulá kondena di Muhammad Aziz, kende tin 83 aña aktualmente, i tambe di Khalil Islam, kende a fayesé na aña 2009, despues di un demanda di fiskal Cyrus Vance i e ekipo di defensa.
“Nos kier pidi diskulpa pa loke tabata un serie di violashon serio i inaseptabel di lei i konfiansa di e públiko”, segun indikashon di Vance na famianan.
E terser persona kondena pa morto di Malcom X, Mujahid Abdul Halim, alias Talmadge X Hayer, a rekonosé ku el a tira dirigente sosial i semper el a defendé Aziz i Islam bisando ku nan no tabata impliká den e asesinato.
“Mi no mester pa niun tribunal, fiskal òf un pida papel bisa mi ku mi ta inosente”, asina Aziz a bisa denunsiando “e sistema korupto” legal di Merka ku “ainda ta familiar pa mayoria hende koló skur den 2021”.
E dokumental di Netflix “Who killed Malcom X’, a influensiá e demanda di eksonerashon aki.
Segun e investigashon, FBI a skonde vários dokumento ku ta impliká otro sospechosonan, manera presensia di agentenan den e sala na momentu di e tiroteo. Un testigu a konfirmá ku Aziz tabata na su kas na momentu di e asesinato.
E dokumental di Netflix ta basá riba insinuashonnan di un historiadó profeshonal di Washington, Abdur-Rahman Muhammad. El a bisa ku e dos promé akusadonan ta inosente i ku e terser a ehekutá e asesinato ku yudansa di kuater miembro di Nashon di Islam di un moské di Newark, serka di New York.
