KRALENDIJK- “Polis i Ministerio Públiko a trata mi kliente inhustamente”, abogado mr. Nicolaas a kondená e trato ku su kliente a risibí. E abogado a defendé Mary Ann B. djabièrnè 15 di yanüari último durante su huisio pa ladronisia i froude. “E investigashon ta sagudí na kada banda.”, e abogado a splika ku e kaso aki ta kanando basta largu. Polis no a investigá mas profundo e deklarashonnan di su kliente. “A trese e denunsiánan den korte, sin polis konfrontá e víktimanan ku deklarashon di mi kliente”, el a bisa. Tambe el a bisa ku polis ta den poseshon di telefòn selular di su kliente den kual tin kombersashonnan ku por tira un lus diferente riba e kaso. “Mi kliente a pidi polis pa investigá esaki i nada no a sosodé”, mr. Nicolaas a agregá.

Petishon pa suspenshon

Abogado mr. Nicolaas a enfatisá ku anteriormente el a hasi petishon pa suspenshon di su kliente pero no a honra esaki. “Mi kliente ta na estado i ademas i tin un yu muhé ku mester di su mama”, mr. Nicolaas a splika. Tambe el a bisa ku fiskal mr. Martis praktikamente a bai di akuerdo ku un suspenshon na momentu ku Ministerio Públiko lo haña e rapòrt di sikiater i sikólogo. Konsekuentemente e rapòrt aki tabata den poder di Ministerio Públiko pa un siman largu sin a laga e abogado sa. Aki a kuminsá un diskushon entre e abogado i e fiskal. “Mi ta tende iritashon den tono di mr. Nicolaas. Tambe e ta insinuá ku deliberadamente no a dun’é e rapòrtnan. Esaki no ta kuadra. Henter e petishon aki a sosodé na final di desèmber 2020. E temporada aki ta unu hopi fèrfelu mirando e dianan di fiesta i fakansi di hopi empleado na Ministerio Públiko”, fiskal Altagracia Reinhart-Martis a reakshoná.

Deliberashon

Hues mr. Edelenbos a suspendé tratamentu di e kaso pa por deliberá. Durante esaki e fiskal i e abogado a sigui ku nan diskushon. “Mi punto ta ku Ministerio Públiko i polis mester hasi nan trabou manera mester ta pa hende haña huisio hustu”. Tabata opvio ku e abogado ta desaprobá loke segun e ta inefisiensia di tantu Ministerio Públiko komo kuerpo polisial. Tambe e tabatin reklamo riba JICN. “Mi tin afsprak ku mi kliente i nan a trese un ora lat. Despues di un ratu nan a bolbe bai kuné. Kon mi por atendé 8 punto ku tin di aber ku e akusashon?’. Hues mr. Edelenbos despues di deliberá a bai di akuerdo pa suspendé detenshon preventivo di Mary Ann B.

Suspenshon

“Bo ta prohibí di tuma kontakto ku e víktimanan i bo amiga ku a testiguá kontra bo. Tambe bo mester mèldu na Reclassering i MHC”. Hues a splika ku si Mary Ann no kumpli ku e kondishonnan lo enkarsel’é. Tambe hues a ordená mas investigashon di parti Ministerio Públiko den e kaso aki. Korte den Promé Instansia lo sigui trata di e kaso kontra Mary Ann B. riba 13 di aprel 2021.

 

 

LAGA UN KOMENTARIO

Please enter your comment!
Please enter your name here