SAN FRANSISCO, AP.- Presidente merikano Donald Trump kier gasta miónes di dòler pa konstruí un muraya na frontera ku México, usando fondo ku el a haña bou di su deklarashon di emergensia nashonal, pero promé ku e presidente avansá e mester haña aprobashon di tribunal.
Un hues federal na Oakland, California, a skucha argumento di dos demanda ku kier blòkia e desishon di Kas Blanku pa gasta plaka di Departamento di Defensa i tesoro den konstrukshon di e muraya.
E gobièrnunan di California i 19 estado mas a presentá un demanda, i e grupo ambientalista Sierra Club i Southern Border Communities Coalition, representá pa e Union Amerikano di Libertat Sivil a presentá e otro.
Un hues federal na Washington ta analisando un intento di Kámara di Representante pa impedí ku Trump ta usa fondo di Pentágono pa e muraya.
E atversarionan di e presidente ta bisa ku e deklarashon di emergensia tabata un intento ilegal pa haña fondo di e muraya, pero e suma ta muchu ménos di loke e presidente ta pidi.
E gobièrnu di Trump ta argumentá ku e presidente ta protehando interes di seguridat nashonal miéntras tin un kantidat sin presedente di famia sentro amerikano ku ta yega frontera na México pa pidi asilo.