MOSKU, Rusia (AFP).-Kremlin a kalifiká komo “positivo i produktivo” un kòmbersashon telefóniko di un ora entre Vladimir Putin i Donald Trump i a afirmá ku e dos dirigentenan ta di akuerdo pa “keda den kontakto permanente” ku otro.
“Na final dje kòmbersashon, e dos dirigentenan a kalifiká esaki komo positivo i bastante produktivo, konfirmando nan boluntat pa keda den kontakto permanente”, segun Yuri Ushakov, asesor diplomátiko di Putin.
Segun Ushakov, Putin i Trump a papia dje konflikto den Ukrania i e presidente ruso “a inform’é detayadamente dje resultadonan” di negosiashonnan entre rusonan i ukranianonan na Istanbul, di kua e di dos buèlta a tuma lugá djaluna último.
Ushakov a akusá Ukrania di “purba na stroba e negosiashonnan dor di realisá atakenan selektivo kontra ophetivonan puramente sivil”, refiriendo na eksploshonnan ku a tuma lugá na Rusia e último dianan.
Pero asina mes, Putin a bisa Trump ku e kòmbersashonnan di Istanbul tabata “util”.
Segun Ushakov, e presidente norteamerikano mas aleu a bisa e mandatario ruso ku e no a keda informá adelantá dje atakenan ukraniano kontra di avionnan di guera ruso durante fin di siman. Un kantidat grandi di avion militar a keda destruí, inkluso bombarderonan stratégiko.
