MOSKU (AFP).- Rusia a bisa di ta trahando riba organisashon di un kumbre nobo entre Vladimir Putin i Donald Trump, posiblemente na Budapest, despues di un kombersashon telefóniko di “kasi dos ora i mei” entre e dos presidentenan. “A kumbiní ku representantenan di e dos paisnan hopi lihé lo traha riba preparashon di un kumbre, ku por keda organisá por ehèmpel, na Budapest”, segun e konsehero diplomátiko di Putin, Yuri Ushakov, na prensa.
“Tabata un kombersashon hopi presis i , na mes momento, ku hopi frankesa i yen di konfiansa”, segun el a agregá, promé di bisa ku e yamada tabata un inisiativa di Rusia.
Ushakov a agregá ku Budapest komo sitio dje reunion tabata un proposishon di Trump, loke dirèkt a keda apoyá di parti di Putin.
E dos presidentenan a papia ku otro un ratu promé ku e presidente ukranikano Volodimir Zelenski a yega Washington pa diskutí ku Trump riba un potensial suministro di misilnan norteamerikano di distansia largu.
“Vladimir Putin a duna di konosé ku e Tomahawks lo no kambia e situashon den e kampo di bataya, pero ku lo e daña di forma signifikativo e relashonnan entre nos paisnan. “Esaki sin menshoná e perspektiva pa un solushon pasífiko”, segun Ushakov a agregá.
Segun Kremlin, Trump a bisa di lo tene kuenta ku loke Putin a trese dilanti promé ku e kombersashon ku lo e tin ku Zelenski awe. For di despues dje kumbre di Alaska, Rusia a intensifiká su atakenan riba siudatnan di Ukrania, afektando e infrastruktura di koriente i treinnan. Ukrania a kontestá ku un ofensiva amplio riba refinerianan petrolero ruso, afektando preisnan di kombustibel i interumpiendo e suministro den algun region.
