Ta urgi gobièrnu kumpli ku lei
WILLEMSTAD.- E koperativa agrario KriaTur ketu bai ta sumamente preokupá pa e nesesidat urgente pa polis haña un sitio di karentena i kuminda pa bestia pa ora ku konfiská bestianan. Di e forma aki tin un lugá pa e bestianan por trankilisá atrobe. Tambe ta alertá gobièrnu pa kumpli ku lei- i kombenionan ku a sera ku e sektor agrario.
Asina direktiva di KriaTur ta trese dilanti den un informe pa prensa. Den e informe ta reakshoná riba e anunsio resien ku tin un rekompensa di 4 mil florin pa esun ku por duna informashon di kabritunan i ròl di waya ku a hòrta for di diferente sitio. Den un komunikado resien polis a informá ku últimamente a tuma lugá ladronisia di un kantidat di kabritu for di diferente tereno aki na Kòrsou unda tin krio di bestia.
Algun di e sitionan aki ta tereno na Oostpunt (konosí komo tereno di Maal), Kalabash na Roi Santu, Wacawa i tereno di “Agrarisch en Visserij Beheer”, AVB (ántes konosí komo L.V.V. ). For di tereno di Maal, malechornan a bai tambe ku di alrededor di 28 ròl di waya di kurá. Segun polis e asosashon di kriadónan di bestia partikularmente, ta sumamente preokupá ku e situashon aki.
Pa e motibu aki a pone un montante di 4 mil florin komo rekompensa pa esun(nan) ku por duna informashon, pa por yega na tantu e kabritunan hòrtá komo esnan ku a hasi nan mes kulpabel na e ladronisianan aki. Pa bini na remarke pa e rekompensa, por duna informashon via di e liña anónimo 108.
Kuerpo Polisial ta kontinuá ku investigashon den e kasonan aki i ke rekordá komunidat ku kumpramentu di tantu e kabritunan komo nan karni, ta kastigabel pa lei. Entretantu EXTRA por a komprondé ku a hasi por lo ménos 1 detenshon relashoná ku e ladronisia d ròl di waya i tambe a haña un total di 16 ròl bèk.
Tumando nota di e informe di polis KriaTur ta duna si análisis di tur loke a tuma lugá último simannan. “Nos komo koperativa KriaTur a presentá un plan alternativo pa frena e akto di Ladronisia, ku ta asotando e servisio na AVB ántes LVV. Nos a tuma nota tambe di un rekompensa 4 mil florin ku a pone pone pa esun ku por koperá i informá na unda e bestianan hòrtá por ta.”
Pero, koperativa KriaTur ta bisa ku e ta sumamente preokupá pa e nesesidat urgente, pa polisnan haña un sitio di karentena i kuminda di bestia pa ora konfiská bestianan pa asina por duna nan kuminda i awa pa por trankilisá e bestianan. “P’esei awe nos di koperativa KriaTur ta bolbe alertá gobièrnu un biaha mas riba su responsabilidat tantu pa lei i kombenionan ku a sera. Nos ta urgi Gobièrnu pa kumpli ku leinan ku relashoná ku kumplimentu ku servisionan ku tin netamente di aber ku e sektor Agrario, ku ta e sektor di agrikultura, krio di bestia, i peska.
“Nos ta referí aki na leinan di sakrifisio di bestia pa garantisá pais di karni di bon kalidat i higiéniko, tantu na servisio veterinario komo ta marshe di Barber.” Den e kuadro aki KriaTur ta konvensí ku mester di un reorganisashon urgente na AVB pa por kumpli ku lei- i kombenionan.
