WILLEMSTAD.- Resientemente, Krioyo Film Fundation ku aña pasá a organisá e promé Krioyo Film Festival, a hasi entrega di e premio “Kadushi di Oro” na  e 16 produktornan ku a partisipá den e eksitoso evento ariba menshoná.

E evento akí a tuma lugá den Starlight na bordo di e Barku Freewinds, kaminda esnan presente a disfrutá di un anochi ameno i despues a disfrutá di un tremendo show di The Freewindsband.

Manera ta konosí, na aña 2024, Kòrsou a konosé su promé Festival di Sine na papiamentu riba pantaya grandi. E evento akí tabata un éksito rotundo, basá riba e kantidat di pelíkulanan repartí den pelíkula kòrtiku, pelíkula largu i tambe dokumentario ku a ser emití (28). Un asistensia grandi di públiko a pone ku e promé edishon di Krioyo Film Festival 2024 tabata un éksito total.

Un dje proyektonan di Krioyo Film Foundation ta pa organisá tur aña aparte di Krioyo Film Festival, entrega di Kadushi di Oro. Komo ku na aña 2024 no a pone kriterionan pa por a skohe e ganadornan den diferente kategoria, a disidí ku lo entregá tur e produktor ku a hasi un esfuerso pa por a pone Krioyo Film Festival bira un realidat, un premio. Si na Merka konosé Oscar i Golden Globe, na Hulanda Gouden Kalf, na Kòrsou a introdusí Kadushi di Oro.

Pa e edishon di 2025 sí Krioyo Film Foundation lo bai entregá e Premio Kadushi di Oro na esnan mas destaká den diferente kategoria. Lo tin un ekipo di hurado bou di supervishon di un instansia lokal ku lo kordiná esaki.

Krioyo Film Festival 2025

Pa loke ta trata Krioyo Film Festival 2025, ya e fechanan ta konosí kaba. Esaki lo tuma lugá di dia 26 di òktober pa 2 di novèmber 2025 den Caribbean Cinemas na Sambil.

Un apelashon ta bai na tur eskritor i produktor di pelíkula na papiamentu, pa kuminsá traha sea nan pelíkula kòrtiku, largu o dokumental, pa asina ei nan por bini na remarke pa partisipá den e di dos edishon di Krioyo Film Festival.

Di parti di Krioyo Film Foundation un danki na tur instansia ku a duna un aporte pa e promé edishon di Krioyo Film Festival por a bira un realidat. Keda pendiente pa e di dos edishon.

 

LAGA UN KOMENTARIO

Please enter your comment!
Please enter your name here