JAIME ANDRES BELTRAN; minister kolombiano.
BOGOTA (AFP).- E minister nobo di bibienda di Colombia a risibí un avalancha di krítika pa motibu di e bai laman ku su famia den pleno krísis di temblor, na momento ku míles di hende ta drumi riba kaya òf den refugionan improvisá despues di a pèrdè nan kas.
E gobièrnu di presidente Abelardo de la Espriella ta pasa den su promé prueba di kandela despues dje temblor di magnitut 7.4 ku a bati henter parti wèst dje pais tres dia despues di su instalashon, ku saldo di kasi 300 morto.
Wikènt último i tambe ayera a sirkulá potrètnan i videonan dje minister Jaime Andres Beltrán, sosegando na un playa na Santa Marta. Oposishon di iskierda a anunsiá di lo promové un moshon di sensura kontra dje mandatario pa motibu di a tuma fakansi den e situashon aktual i a deskuidá e atenshon pa míles di famia ku ta pasa anochinan riba kaya despues ku den kareda di 27.000 kas a keda destruí.
“Mi ke ta enfátiko pa splika ku mi no tabata ku fakansi, mi kier a kompartí algun ora huntu ku mi kasá i yunan despues di algun dia di no a mira nan. Despues di esei, di forma inmediato, lo mi sigui ku mi trabou di atendé e fasenan di rekonstrukshon dje zonanan gòlpiá pa e temblor”, segun e minister a skirbi riba X.
Djadumingu último tabata e presidente De la Espriella ku a bishitá Chocó, e departamentu mas pober di e pais, kaminda a registrá e episentro dje temblor. Einan el a keda kritiká pa hendenan dje pueblo pa motibu di tabata tira balanan di futbòl for di su vehíkulo, blindá ku e ‘slogan’ di su kampaña presidensial imprimí riba e balanan: “Firme por la patria”.
