KRALENDIJK – Despues di e deklarashon alentador di Gezaghebber John Soliano ku a lokalisá e krokodel den área di palu di mangel djaluna mainta, parse ku e krokodel a bolbe disparsé. Te ainda STINAPA ni Gezaghebber no a informá di esaki, pero fuentenan konfiabel ta indiká na momentu ku djaluna durante dia a bai en buska di e bestia, no por a hañ’é mas na e kaminda ku lokalis’é. Mesora a bolbe habri e búskeda di e krokodel, pero te ku ayera tardi, segun nos fuente, esaki sin resultado. Parse ku e bestia ta move hopi lihé, kontrario na loke ekspertonan a indiká.
Esaki ta bisto tambe di e kaminda a lokalis’é, ku ta un distansia hopi leu for dikaminda a mir’é pa promé biá, òf mester tin mas ku un krokodel den bahia di Lac. E sitio kaminda a lokalisá e bestia ta den e área di palu di mangel den besindario di Boka di Koko, na e rant pariba di bahia di Lac, pa nort di Cai. Si e ta move asina lihé, no ta ekskluí e posibilidat ku e por bai resultá den un área mas grandi konosí komo Den Puitu. Durante djaluna, rangernan di STINAPA a buska den besindario Mangrove Info Center na Kaminda Lac. A sera e kaminda pa e área pa públiko i asta prensa no por a pasa.
Image: HopiBonaire
link to our website: https://www.hopibonaire.com
