DAKAR, SENEGAL, AP.- Un organisashon internashonal di yudansa a bisa djaweps ku a sobra fondo solamente pa dos siman di entiero pa e víktimanan ku a muri pa ébola den oriente di Congo.
E Federashon Internashonal di Krus Kòrá a afirmá ku no por sigui sostené e trahadónan ku ta dera e víktimanan di ébola si e organisashon no a haña mas fondo.
Ebola ta un enfermedat sumamente kontagioso i ta wòrdu transmití atraves di kontakto humano.
Kada entiero di ébola ta kosta 500 dòler debí na e uniformá di protekshon di e trahadónan, entre otro.
E epidemia di ébola na Congo a oumentá durante e último luna ku a pasa. E ministerio di salú a bisa ku 20% di e kasonan registrá desde ougùstùs a wòrdu reportá den e último tres simannan.
