WILLEMSTAD.- Wega di preparashon pa Mundial ta pa inventarisá kiko tin den kas. E wega kontra Eskosia tabata di un nivel muchu mas haltu ku e dos partidonan na Oustralia. Tabata un bon promé mitar, esei pasobra Tahith, Bazoer i Obispo a mustra ki diferensia hungadó di nivel por hasi. Ta di lamentá ku a disidí será kurá pa otro hungadónan di nivel, si no awe nos lo por tin un trio di defensa sentral ku nos por presentá tur kaminda kuné. Pero laga nos wak dilanti.
Otro kos ku nos a siña ta motivashon. Nos mester ta motivá pa dominá emoshon i no tuma karchi pòrnada a kosto di e totalidat. Si Locadia lo no a haña e karchi, nos lo a saka mas for di e partido. E karchi ta konta. Esei ke men ku e no por hunga den e wega kontra di Aruba. Esei no ta nada, ta un wega mas festivo ku otro kos. Dependé si kiko e árbitro yena riba su formulario. Normal ta un wega, pero e por bira dos i e ora ei e ta pèrdè e wega kontra Alemania tambe, kaminda mester di dje. Mi no ta kere estando Mundial den porta, e lo bira dos wega. Tur hende a hasi nan bèst promé mitar i nos a siña tambe ku sali for di un defensa di sinku riba kontra gòlpi, ta nos mihó opshon.
Kon bin Sontje, Brenet i Sambo afó hinter wega?
Un nota krítiko. Pa esnan ku no sa, Sontje ta hunga riba mes nivel ku Tahith i tambe por ta mortal den kontra gòlpi, ku ta su spesialidat. Según mi, e mester a haña maske ta un pida i preferibel kuminsá kuné. Brenet ku Sambo ta dos di nos mihó defensanan lateral. No ta pòrnada nan si tin balor mionario. Brenet a hunga Eredivisie, Bundesliga i awor den Süper Lig Turko. E dos últimonan aki ta konta den e bon kampionatonan Europeo, kaminda hungadó di nivel ta militá. Sambo ta propiedat di Burnley, ku tabata e aña aki den Liga Premier i e ta fiá na Sparta. Fo’i ora un ekipo di Premier kumpra bo, bo nivel ta haltu, sigur pa Kòrsou. Ku nan, bo tin mihó defensa, mihó dominio di bala i ménos foul rondó i den bo área penal i nan ta sali mas fásil ku e bala tambe. No ta komprendibel kon tur tres a sinta hinter e wega riba banki. Nan ta den e mihónan ku nos tin. Nos no sa e motibu.
Mester motivá e hungadónan
Ta kos serio nos ta bezig kuné i ke duna e mihó prestashon na Mundial pa nos país. Mester ta konsentrá, paso ta karga pisá nos ta bai haña. Mester ta di ‘fokus’ riba esei i no por kometé fayo manera kontra Eskosia. Tampoko hungadónan no tin nada di reklamá rèfri manera Juninho ta hasi. Unu e no ta kapitan, dos, e ko’i no ta yuda nos ku nada i tres si e haña karchi, e ta perhudiká e ekipo, paso e ta un di e bon hungadónan, si e hunga manera lastu aki den Volendam, dunando bon pase i traha duru.
Ku algun adaptashon nos lo duna un bon presentashon.
Mi no ta wòri ku e di dos mitar, pasobra nos mester di tur 11 hungadó pa por presta riba nivel di Mundial. Nos no ta den Karibe mas, pero den e grandinan awor. Antonisse i Noslin a drenta bon den di dos mitar i ta duna speransa pa futuro, ainda tin Margaritha ku tabatin un bon aña na Bèlgika i a promové pa e divishon máksimo. Mi ta konvensí ku Sontje, Brenet i/of Sambo aden nos nivel lo ta aun mas haltu ku e promé mitar. Tur hungadó meresé pa bai Mundial, paso nan tur a aportá na nos éksito. Pero no ta tur hungadó mester hunga na mundial si. Ei ta representashon di pais. Tur mester ta kla pa hunga, pero di mes, esnan mihó ku a prueba di tin mas nivel, mester ta riba tereno kontra e tres trabukonan ku nos mester purba wanta. Duna presentashon digno ta lo mas mínimo ku nos mester eksigí. ‘Pantera Negra’ mester laga tur kos riba tereno pa Kòrsou i representá nos baranka dignamente. BIBA KÒRSOU!!
Skirbí pa: Eldon “Pepia” Sulvaran.
