Emirto (Mirto) Martis ta duna hóben i adulto lès di kuarta i kitara na skol Maria Auxiliadora na Sta Maria. Ta trata di lèsnan grátis komo su kontribushon na komunidat. El a konta nos ku e no ta un kitarista pero el a bai lès serka Win Prudencia. Mirto su yu tabata bai lès promé i e tambe a disidí di sigui lèsnan. Mirto a menshoná e tempu ei Fecco Gomes, Wan Camelia, Bencho Schoop, John James Willekes, Ronchi Matthew, nan tur tabata den klas huntu. I Mirto tabata bon den teoria ounke e tabata mas den kantamentu. Despues ku e kurso a kaba kada ken a bai riba nan mes i Mirto a disidí ku e ta sigui pa siña mucha músika. E ta masha kontentu di por mira hopi di e muchanan ku a pasa serka dje. El a menshoná Royston ku ta toka ku Randal Corsen, Clinton Hato kantante fama kua progresá hopi ku mihó piesa asta di Kòrsou. Kirindongo basista na Ulanda, Omar Sling ku su Viva Kids, Francis Sling ku ta mas den pintamentu awor aki i asina e por sigui menshoná mas ku a haña lès serka dje. Mirto ta kontentu ku su espíritu a kontagiá e muchanan ku hopi a sigui i ta kosechando éksito banda ku nan ta aportá na kultura di Kòrsou.
Duna bèk na komunidat
Mirto ta den Legion di Maria i un di e eksigensianan ta pa por hasi 2 ora di trabou pa siman i den reunion tin di reportá kiko ta bo kontribushon e siman ei pa komunidat. Por a skohe pa bishitá hende malu na hospital, hasi hospital i diferente obra mas. Pero Mirto a tuma e dos oranan djasabra mainta pa e siña mucha. E ta trein e muchanan di mitar di 10 pa mitar di 12.
Les pa adulto i hóben
E ta kòrda ku ta Stanley Ignacio a hink’é den e kos aki. E ta kòrda ku Stanley a bin serka dje den e cafe na Mangusa ku e ta bishitá tur mainta. Stanley sa ku einan semper Mirto ta. Promé ku covid e no tabatin masha interes i ora covid a dal aden tabata pió. Pero ora Stanley a aserká su interes a lanta bèk i el a aseptá mesora pa e hasié. Asina nan a forma e grupo di adulto i hóbennan i ta bayendo masha bon. El a bisa ku e ta sali su kas kontentu pa duna e lèsnan i e ta mirando e interes di e hóben i adultonan den e lèsnan.
Kitara mas difísil i kuarta mas fásil
Riba e pregunta di kua instrumènt ta mas difísil, Mirto ta kere ku sigur Kitara miéntras kuarta ta esun mas fásil. Ku kuarta no ta usa masha dede i asta ku 2 dede ta saka muzik. Mayoria mucha ta kuminsá ku kuarta. Mirto mes ta konsehá e muchanan kuminsá ku kuarta i despues por sigui pa kitara. Ounke e kitara ta esun mas mihó pasobra bo mes por toka pa bo mes i animá bo mes.
Importante pa siña un instrumènt
Ta importante pa un hóben por siña un instrumènt for di chikí. Esaki ta yuda e hóben desaroyá su mes. Siñando instrumènt ta kita e hóben for di kaya i ta hinka algu positivo den dje. E muzik ta hasi algu pa dominá e hóben sigur. E muzik ta laga e hóben trankilisá tambe.
Idea ku a haña hopi akohida
Stanley Ignacio manera Mirto a menshoná ta esun ku a hink’é den e kos aki. El a splika ku ta algu ku a kuminsá masha simpel pero a bai den grandi masha lihé. E ta kòrda ku den su programa di radio un persona a yam’é i a bis’é ku e tin hóben ku ke toka kitara pero e no tin moda di kumpra kitara. Stanley a menshon’é den su programa i sin pensa el a kuminsá haña kitara i kuarta un tras di otro. El a haña kuarta den nan kaha ku nan yunan tabata usa. I asina el a haña diferente kuarta i kitara. Stanley a aserká Mirto pa mira si por hasi algu. Asina el a dal den Mirto na Cafetaria di Mangusa i el a logra konvensé hopi lihé pa e lèsnan. A anunsiá e lèsnan entre otro den EXTRA i a haña muchanan. Na kuminsamentu e interes tabata poko slou pero despues el a kue su rumbo te awor tin 15 hende ta sigui e lèsnan serka Mirto.
Danki na tur ku a kooperá
Stanley ke gradesí tur ku a kooperá di un manera òf otro ku e opsekio spontáneo aki. Tur loke el a haña tabata den bon kondishon. I asina tur mucha por a haña kitara i kuarta pa nan trein kuné. Nos konosé hopi artista grandi aktualmente ku kisas no ta ni duna gradesimentu na loke a haña serka Mirto, pero ta aki nan a kuminsá i bira grandi i awendia nan ta rònt mundu sakando kara di Kòrsou. Stanley mes ta papia ku e personanan ku ta sigui e lèsnan hopi bia i el a lansa e idea pa lanta kor. Hopi di e profeshonalnan grandi i ku ta awendia instruktornan di músika, ta den kor nan a kuminsá i nan a sigui perseverá i a bira kaminda nan ta. Mañan ta nan por ta e ‘role model’ i e grandinan ku ta representá Kòrsou na otro pais. Esei ta nan deseo segun Stanley i nan lo sigui traha riba dje. Ya nan a kuminsá trein kantikanan di misa pa por duna presentashon.
Un bon lider no ta wak su mes
Tendiendo Stanley papia di nos tabata interesante pa sa si e ta toka instrumènt. El a bisa ku su intenshon i ta pa toka pero komo lider bo tin di wak pa otro bai dilanti. I esei ta su meta semper, den su trabou mes di korant kuantu di esnan di awendia ta serka dje nan a siña. Pe esaki ta lag’é sintié bon pasobra el a yuda otro bai dilanti, perseverá i bira grandi. Un bon lider no ta wak su mes pero ta wak otronan.
