Hòmbernan afgano ta bandoná un stadion di futbòl kaminda ku a ehekutá dos dje hòmbernan hañá kulpabel di asesinato.
KABUL, Afganistan (AFP).- Outoridatnan afgano ayera a ehekutá kuater hòmber kondená pa asesinato. E ehekushonnan a tuma lugá den stadionnan kargá ku hende, elevando na 10 e kantidat di ehekushon públiko for di despues ku talibannan a regresá na poder den 2021.
Esnan kondená a keda ehekutá ku tiru dilanti di desena di míles di persona den tres siudat di Afganistan. Ta trata dje kantidat mas haltu di ehekushon riba un dia for di 2021.
Un dia promé, outoridatnan lokal a hasi un yamada riba funshonarionan di gobièrnu i siudadanonan pa akudí i “partisipá den e akto”, durante kua a prohibí tur tipo di kámara i telefòn selular pa evitá ku ta publiká imágennan.
E Komisario di Nashonnan Uní pa Derechinan Humano a deklará su “konsternashon” pa e ehekushonnan.
“Nos ta preokupá i tristu pa e ehekushon di kuater hòmber den e provinsianan di
Badghís, Nimruz i Farah”, segun e organisashon a skirbi riba X den un mensahe ku a kontené un yamada na outoridatnan di Afganistan pa imponé un moratorio riba e uso di kastigu di morto.
Dos hòmber a keda ehekutá dilanti di mas o ménos 20.000 persona den e stadion Qala-I-Nawe, e kapital dje provinsia Badghis den nortwèst dje pais, kumpliendo ku e prinsipio islámiko, e lei taligon. Esaki ta stipulá ku un asesinato ku a tuma lugá mester “paga” ku pèrdida di otro bida, segun Korte Supremo.
Famianan dje víktimanan a keda konsultá si nan ta akseptá pa pordoná e akusadonan, pero esakinan a nenga e pordon, segun Korte Supremo.
E dos hòmbernan kondená tabata “sintá ku lomba pa públiko”. Famianan dje víktimanan tabata nan tras i a tira nan ku pistol.
E promé hòmber ehekutá a mata tres persona, e di dos unu. Famianan yegá na esnan kondená a pidi pordon i a ofresé un kompensashon ekonómiko, pero famianan dje víktimanan a nenga na konsedé pordon.
Na Qala-I-Nawe un hòmber kondená a risibí diesdos impakto di bala. Otro hòmber a keda ehekutá den e siudat Zaranj, tambe den stadion kargá ku públiko.
