ABELARDO DE LA ESPRIELLA; manera el a primintí, dirèkt despues di a sinta el a kuminsá ataká gueria kolombiano.
BOGOTA, Colombia (AFP).- Kuater menor di edat a muri den e promé bombardeonan ordená pa e flamante gobièrnu dje derechista Abelardo de la Espriella den zonanan kontrolá pa gueria. Dos hóben di 15 aña i otro dos di 16 a muri den e atakenan aéreo den Amazon i na e frontera ku Venezuela kaminda gruponan armá ta disputá e ganashinan di narkotráfiko, e mineria ilegal i ekstorshon.
“E kriminalnan, kendenan durante di dékadanan a bin ta reklutá menornan pa konbertí na den kombatiente òf den eskudo humano, mester paga pa e krímennan ei ku ta violá Derechinan Humano”, segun e presidente a bisa riba X. For di despues ku el a huramentá dia 7 di ougùstùs, e bombardeonan ordená pa De la Espriella a laga por lo ménos 26 morto, meimei den e pió ola di violensia den último dékada na Colombia.
E mandatario a yega na poder ku e promesa di lo ataká i sigui ataká gueria i narkotrafikantenan ku apoyo di su aliadonan Merka i Israel. “Tur mi respaldo pa operashonnan militar ku ta bringa kontra di gruponan di narkotráfiko”, el a agregá.
E atakenan tabata kontra di e gueria “Ejército de Liberación Nacional” (ELN) den e region di Catatumbo, na frontera ku Venezuela, i kontra un disidensia di e loke tabata FARC den El Guaviare, den parti zùit dje pais.
Aña pasá a registrá 428 kaso di reklutamentu di menornan di parti di gruponan armá, segun Defensor di Pueblo. E aña’kí, te ku 31 di yüli, a registrá 97 kaso.
Organisashonnan di defensornan di derechinan humano a alertá riba e impakto di e bombardeonan riba muchanan víktima di reklutamentu den zonanan pober dje pais.
