FREDERICTON, CANADA, AP.- Un tiroteo registrá den un siudat kanades chikitu djabièrnè a laga kuater morto, entre nan dos polis ku a atendé un notifikashon riba un tiroteo. Esaki a sorprendé e pais ku den último lunanan a biba vários insidente di violensia di masa.

E habitantenan di Fredericton, kapital di e provinsia di New Brunswick, na ost di e pais, a indiká di skucha sigur 20 tiru despues di un konfrontashon. Polis a sera un sekshon amplio di e siudat ku vehíkulonan di emergensia i a ordená e residentenan pa keda den nan kas i nan negoshinan.

Finalmente, despues di un periodo tenso di espera, polis a anunsiá ku entre e kuater mortonan tabatin dos di su agentenan, un kaso inusual di polisnan ku ta fayesé miéntras nan ta ehersé nan labornan na Canada.

Martin Gaudet, suphefe di polis di Fredericton, a bisa ku e dos agentenan a yega e edifisio di apartamentu i a mira dos sivil morto promé ku nan a wòrdu ataká.

Un hòmber di 48 aña gravemente heridá a wòrdu arestá, segun Gaudet, sin ku el a wòrdu identifiká. E motibu di e atake no a wòrdu determiná.

Un di e polisnan tabata Sara Burns di 43 aña, kasá ku tres yu i Robb Costello di 45 aña, kual tabatin kuater yu. E nòmber di e sivilnan morto no a wòrdu dibulgá.

 

LAGA UN KOMENTARIO

Please enter your comment!
Please enter your name here