PORT-AU-PRINCE, HAITI, AFP.- Un temblor a laga por lo ménos kuater morto djamars i mas ku 36 herido djaweps na wèst di Haiti, segun informashon di outoridatnan di Protekshon Sivil di e nashon karibense.
E temblor di 4,9 riba skala di Richter a sosodé den departamento isolá di Grand’Anse, ku ta kasi 300 kilometer na wèst di e kapital di Port-Au-Prince. Esaki tabatin un profundidat relativamente abou di 10 kilometer, segun Servisio Geológiko di Merka.
Tres di e mortonan “ta miembronan di e mesun famia i a muri ora nan kas a basha den otro”, segun e hefe di Protekshon Sivil di Grand’Anse, Christine Monquele na AFP djaweps.
Por lo ménos 36 persona a resultá heridá.
E temblor aki ta sosodé algun dia despues di tormentonan fuerte ku a gòlpia Haiti, e nashon mas pober den parti wèst di e hemisferio. E mal tempu a kousa por lo ménos 42 morto i 11 persona pèrdí, segun servisio di Protekshon Sivil.
“ONU ta prepará pa traha ku outoridatnan di Haiti i otro sosionan pa yuda aliviá sufrimentu di esnan ku tin mester despues di e temblor i, tambe e inundashonnan i desplasamentu di tera ku nos a mira den último dianan”, asina e bosero di sekretario general di Nashonnan Uní, Stephane Dujarric a bisa.
