WASHINGTON, MERKA, AFP.- Departamentu di Hustisia di Merka a akusá kuater polis di a mata e hóben afroamerikano Breonna Taylor, kombertí den un íkono di e movementu antirasismo i deskriminashon Black Lives Matter.
Merrick Garland, sekretario di Hustisia i fiskal general merikano a bisa ku e ofisialnan ta enfrentá kargonan federal pa delitonan kontra derechinan sivil, konspirashon ilegal, deklarashonnan falsu, uso inkonstitushonal di forsa i opstrukshon.
“Nos ta alegá ku e delitonan aki a resultá den morto di Taylor”, asina Garland a konkluí.
E morto di Breonna Taylor i George Floyd, un hòmber afroamerikano di 46 aña a keda asesiná pa un polis blanku di Minneapolis den mei 2020, a kousa olanan masal di protesta na Merka i otro partinan di mundu kontra inhustisia rasial i brutalidat polisial.
Taylor di 26 aña i su pareha Kenneth Walker, tabata drumiendo den nan apartamento na Louisville Kentucky na momentu ku nan a tende un zonido na porta alrededor di meianochi riba 13 di mart 2020.
Walker a pensa ku ta trata di un robo i el a tira un agente polisial heridando e.
E agentenan, kende a haña un òrdu pa drenta e kas komo parti di un investigashon di tráfiko di droga kontra e èks frei di Taylor, a reakshoná ku mas di 30 tiru i a mata e hóben.
