Kubanonan ta drumi riba kamanan improvisá na aire liber dje piso mas ariba di edifisionan. Hopi ta esnan ku a skohe pa adaptá nan mes na e situashon aki.
LA HABANA (AFP).- Ku fèn ku no ta traha debí na blackout i e temperatura haltu di zomer ku ta konbertí kasnan den un fòrnu, mas i mas kubano ta pasa anochi drumiendo na aire liber kaminda nan por haña un poko bientu.
Tur dia den oranan di atardi den La Habana, Alexis Mijan ta warda huntu ku su yu siegu pa solo kuminsá baha tras di edifisionan di Centro Habana pa subi riba dak di e edifisio kaminda nan ta biba. Na momento ku blackout a kuminsá bira frekuente na komienso di aña, nan a disidí pa drumi riba dak. I hopi lihé otronan a djòin.
“Kasi tur e abitantenan a bin aki pa drumi”, segun un hòmber ta konta na AFP, miéntras e ta prepará su laken i akomodá su kusinchi riba un tanki di awa bashí. E área a bira un sitio kolektivo pa drumi. Entre tankinan i tuberia, kada famia ta okupá su mes espasio. E manera ku ta distribuí esaki no ta ofisial, pero tur hende ta respetá.
Ora ku skuridat kaba di tapa La Habana, Mijan for di haltu ta opservá kon e siudat ta paga. Pero e silensio nunka ta kompleto: ta skucha e generatornan privá , kachónan ku ta grita i, di bes en kuando, e zonidonan di wega di dominó.
E situashon riba e isla di 9.4 mion abitante ta keda konsiderá komo esun di mas krítiko den dékadanan. For di yanüari, e sanshonnan fuerte di Merka i e eskases di kombustibel a hasi e krísis energétiko mas grave i esaki ta provoká ku kada bes koriente ta kai afó i e suministrá di awa ta para.
Na La Habana, daknan di edifisio, parkenan i tur demas sitio ta yena kada anochi ku hendenan drumí riba karton, kolchon òf te hasta abou na suela.
Dilanti di laman, e famoso muraya di “malecon habanero” den oranan trempan di anochi ya no ta un sitio di paseo pa turistanan i esnan enamorá. Desena di hende ta akomodá nan mes riba e muraya di semènt ku ainda ta poko kayente. Riba e muraya nan ta drumi sintiendo e brisa di laman. Kolchon, klechi, sèrbètè i otro kosnan ta keda usá den un kamber improvisá na aire liber.
Mainta trempan, e alarma di e poko selularnan ku a konservá bateria ta lanta e hendenan. “Mi no ta mira e final di e kos aki”, segun Mijan miéntras e ta rekohé su laken i kusinchi promé ku e kana bai trabou. Ounke e tabata maestro di sosiologia, el a bandoná e profeshon pa buska mihó entrada.
De un pais sin kombustibel ku apénas algun ora di elektrisidat, òf tin dia nada di elektrisidat, e deskanso anochi a bira un luho ku masha poko kubano por permití nan mes.
