E problema di falta di kombustibel tambe a bira algu hopi serio na e pais awor ku nan no ta risibí gasolin for di México.
LA HABANA, Cuba (AFP).- Kubanonan, kansá pa e sufrimentu di blackout konstante, a bati alarma pa e menasa di Donald Trump di kastigá e paisnan ku bende petrolio na Cuba. Kubanonan ta skohe pa un salida di negoshá pa evitá un mayor deterioro dje situashon ku ta bati nan. “Mi ta kere ku esei ta e mihó kos, pues pa negoshá i pa yega na un akuerdo ku ta bon pa tur hende i no perhudiká nos mas tantu ainda”, segun e botikario Vivian Valdes (60).
Trump, kende ya a kòrta e entrada di petrolio ku yudansa di Venezuela na Cuba, djaweps a firma un órden ehekutivo ku e menasa di imponé sierto tipo di belasting riba e paisnan ku bende krudo ku e isla komunista, konsiderando ku e pais ta representá un: menasa eksepshonal” pa seguridat nashonal norteamerikano.
“Si nos no negoshá, e situashon lo bira pió kompará ku loke nos ta bibando i e pueblo no ta bibando bon”, segun Valdes kende ta yora miéntras ku e ta konta dje trabou den kua e ta pasa pa por kumpra remedi pa su mama, kende ta sufri di alzheimer. E preshon ku Trump ta pone ta preokupá kubanonan kondená a mira kon último simannan e kantidat di blackout a bin ta oumentá, awor te hasta mas ku 10 ora pa dia sin koriente den e kapital. Tambe por mira filanan masha largu na pòmnan di gasolin pa kumpra kombustibel.
Cuba pa mas ku seis aña ta den un krísis ekonómiko hopi grave, ku skarsedat den tur tipo di produkto.
