WILLEMSTAD.- Durante un entrevista ku EXTRA a hiba ku bosero polisial Imro Zwerwer, el a splika ku Kuerpo Polisial na e momentonan aki ta hasiendo un outo- purifikashon den e organisashon.
Manera ta konosí, últimamente tabatin algun miembro di e organisashon ku a hasi nan mes kulpabel na echonan kastigabel ku ta bai kompletamente kontra nan funshon.
Zwerwer a bisa ku e tim di maneho diariamente ta papia ku nan miembronan pa konsientisá nan riba nan trabou, funshon i responsabilidat.
Pero esun ku faya ku esakinan ta despedí di nan for di Kuerpo.
Banda di esaki e bosero a splika ku Kuerpo Polisial Kòrsou tin un trayekto andando pa kuminsá reklutá miembronan nobo pa e organisashon.
E idea ta pa hasi esaki tur aña di nobo den futuro.
Zwerwer a bisa ku e personanan ku lo solisitá pa polis meskos ku maestronan di skol òf otro funshon, ta refleho di un komunidat.
Pues esei ta nifiká ku no por evitá ku lo por haña algun ku lo bai kana e kaminda skùin. Pa konkluí Zwerwer a bisa ku tin hopi polis ta trahando duru mas di 12 òf 16 ora apesar di tur kos, lagando nan famia atras pa sigui tene òrdu i trankilidat den e komunidat aki pasó nan ta stima e komunidat di Kòrsou.

LAGA UN KOMENTARIO

Please enter your comment!
Please enter your name here