WASHINGTON, AP. – Kapitalnan europeo, Kas Blanku i entre e lidernan di Donald Trump mes tin hopi preokupashon i kondena, despues ku e kandidato republikano a insinuá ku Merka por bandoná su kompromisonan militar ku NATO den kaso ku e wòrdu skohé komo presidente.
E lider republikano di Senado, Mitch McConnell, kende a respaldá Trump den e konvenshon di partido apénas dos dia pasá, a bisa ku e no tabata di akuerdo ku e deklarashon, pero ku e tabata dispuesto na “anotá esaki komo un eror di nobato”.
McConnell a definí NATO “komo un aliansa militar mas eksitoso den historia di mundu”, durante un entrevista via Facebook ku New York Times.
Na Bruselas, e sekretario general di NATO, Jans Stoltenberg, a bisa ku e akuerdo di e aliansa ta evidente: “Nos ta defendé otro”.
“Mi no ta interferí den e kampaña elektoral di Merka” pero el a agregá ku “Dos guera mundial a mustra ku pas na Europa tambe ta importante pa seguridat di Merka”.
E bosero di Kas Blanku, Josh Earnest, a indiká ku tur presidente desde Segundo Guera Mundial, republikano òf demókrata, a respaldá e akuerdo ku NATO.
