Hopi hende kisas a tende di dje, pero tòg nos por bisa ku mayoria di pueblo no sa ku den naturalesa di Kòrsou tin un bestia, den e kaso aki e biná, ku ta un bestia protehá. Ta nos maskota di Kòrsou i ku den su sorto ta úniko den e área di Karibe aki. E biná rabu blanku (Witstaarthert).
Sinembargo tin un preokupashon ku EXTRA kier a pone énfasis riba dje i esei ta e sospecho ku e bestianan aki ta keda matá i nan karni na konsiderá komo un delikatesa. Di otro banda no solamente e biná ta un bestia protehá meskos ku e turtuga i e yuana pero e biná por trese sierto enfermedat den su karni ku nos tin di paga bon tinu kuné. I p’esei EXTRA a papia ku Dominique Adriaans hefe di e parkenan nashonal ku ta kai bou di Carmabi i tambe Eric Houtepen investigadó i konsultant di Carmabi riba punto di bista pa ku e situashon aki.
E biná di Kòrsou
Dominique Adriaans ta splika ku nan ta sospechá ku tin entre 300 pa 350 di e biná aki na e parkenan nashonal esta Kristof i Shete Boka. Pero banda di dje tin biná na Bullenbaai, landfill Malpais, Kenepa, Jankok tambe. Nan ta den diferente área i pa nan e biná ta un bestia spesial. Por bisa e ta spesial den mundu kompleto i esaki hopi hende no sa. Tin alrededor di 300 pa 350 di e binánan aki na Kòrsou. E ta úniko i p’esei nos mester kuida nan, mester tin e konsientisashon den pueblo di nan importansia. Biná ta eksistí pa 4 mil aña kaba tempu indjannan a bin Kòrsou ku barku. Ainda falta hasi mas investigashon riba e binánan. I p’esei ke pone kámara pa por wak i analisá e bestianan aki.
Biná na skiu
E biná no ta kana den grupo grandi pero sea su so òf di mas tantu nan 2. E biná ta un bestia masha tímido, nan nanishi i orea ta masha sensitivo. Nan ta tende for di distansia hopi grandi i nan ta hole tur kos di leu. Nan ta skiu. E parkenan nashonal ta haña hopi bishitante pero ta masha difísil pa mira e biná. E ta asta difísil pa mira pa nan di Carmabi mes tambe. Su koló i spesialmente den temporada di sekura nan ta skonde di tal forma ku bo no ta mira nan. Nan orea ta grandi i ta tende masha bon miéntras e nanishi ta bon desaroyá, E biná no ta gusta hende i ta keda leu di hende. I p’esei no ta asina fásil ku nan por bebe awa for di baki ku man di hende a mishi kuné. Nan nanishi ta pone ku nan ta sinti esaki.
Libertat
Biná mester di libertat i mester di hopi espasio. Si kompará kaminda tin biná den eksterior por mira ku nan mester tin un área grandi, Kristofelpark ta 23 kilometer kuadrá i ta 300 biná ta biba ei den. Pero no solamente den e parke pero pafó di e parke tambe tin e binánan aki. Nan ke e seguridat di e binánan pero nan di Carmabi no por bai pone hèki i hèkwèrk rònt di e parke i sera esaki pa protehá e bestianan. E biná mester move di un banda pa otro i tambe pa prevení insesto. Mester di un poblashon salú di e biná i esaki por logra solamente si ta laga nan kana rònt den área grandi. I p’esei parti di e área tin hèki i otro no tin.
Na Kristofel sa organisá e rekoridonan kaminda ta bai wak e binánan. Nos por menshoná e deerspotting Safari tours pero tambe tin e Herten trail na unda Koninklijke Marine a traha un lugá pa por wak e binánan. Ounke mester bisa ku no tur biaha segun Dominique ta logra wak un biná, pasobra ta bestianan skiu. E rekoridonan sa sosodé den oranan di atardi i nan ta bai den área di seru bientu, tras di seru Kristof i despues di 4 or di atardi tráfiko a baha i tur bishitante a bai i por mira e biná. Tambe ta dependé di e temporada por ehèmpel si ta áwaseru ò sekura. Ora ta hopi seku por wak mas leu dor di e mondinan i por wak mas biná. I ora ta bèrdè ta wak poko di nan.
E biná ta sòru pa su mes kuminda i bibida. Nan ta kome mata, infrou nan ta trapa ariba pa haña e awa. Un biná por keda 2 pa 3 dia sin awa. Tin diferente pos den e área por ehèmpel e Pos Monton ku ta manera un vijver grandi i por mira e binánan ta bebe awa einan. Pero tambe di un manera òf otro e binánan ta trese otro pa bebe e awa einan. Pero tambe tin bakinan ku ta parti di e monumento Sabaneta i tin diferente pos di pia.
Seguridat di e biná
Tin un preokupashon pa e seguridat di nos binánan. Dominique Adriaans a menshoná entre otro e trahamentu di kasnan kaminda ta kue un área pa traha kas ku ta un nesesidat pero ta pasa buldozer den e área i e ta spanta e biná i e ta bai di e sitio. E biná ta buska área ku nan ta sinti nan mes protehá kaminda tin awa, sombra i palu. Mas kaya i tráfiko ta kore ku e biná. Hende tambe ku ta kue e binánan pa kome.
Biná ku malesa
Carmabi ta hasi investigashonnan i ta duna konseho na gobièrnu entre otro riba turtuga, para pero tambe biná. I un kos ku nan a ripará ta ku nan a haña un kantidat chikitu ku ta mustra algu físiko straño manera ta burachi nan ta. A kue e binánan aki i a duna na un dòkter di bestia i ta kere ku nan tin un malesa neurológiko. Ta un malesa di kabes pero Carmabi no sa masha hopi ainda. Ta trata aki di 5 biná ku e malesa síntoma di fuma. Nan a hiba nan dòkter i despues di 1 pa 2 dia nan a muri. No sa kuantu mas lo por a muri den e área grandi i kuantu mas lo por ta infektá ainda. Un biaha mas no tin muchu informashon pero ta investigashon ku a manda hasi na Ulanda lo determiná esei. Biná sa sufri di un ke otro malesa den e kaso aki tin e Zombi vírus ta na Merka. https://www.vox.com/2019/2/21/18233227/zombie-deer-disease-map)
No kome biná
Un konseho pa hendenan no kome e biná, Bo no sa ku bo a kome un salú òf un ku tin e malesa ku no sa ainda ta kiko e tin. Ta investigashon profundo mester hasi.
Biná; nos orguyo
No solamente pa e malesa pero tambe pasobra ta un bestia protehá. Dominique a bisa ku e ta masha orguyoso di ta traha na Carmabi i ora e kana rònt ku su T-shirt ku Carmabi ariba i ora e insitá hende pa wak e biná, nan ta spanta ku Kòrsou por tin biná. Hopi hende no sa i ta kere ku ta un sprookje di Walt Disney esaki ta.
But si mishi ku e biná
Biná ta protehá den lei i tin sanshon si haña ku hende a kue un biná. Den lei ku ta duna un but di 50 florin. Ta un lei di 1926. Eric ta haña ku kisas e lei ta bieu pero e ta un bon lei. Solamente e tin di keda adaptá i modernisá.
Eric Houtepen komo investigadó na Carmabi a splika ku durante di e rekoridonan regular nan ta konta kuantu biná ta mira. I den algun luna e por duna e promé datanan pa sa kuantu i unda por tin ounke e ta keda difísil pa bisa presis ta kuantu tin. Banda di e programa di monitòr ta bai kuminsá un otro programa pa e kantidat di biná na Kòrsou kompleto.
Dominique Adriaans
Hefe parkenan nashonal
Eric Houtepen
Investigadó i konsultant Carmabi
