…Demostrantenan ta lansa gritunan kontra di presidente di Merka Donald Trump, rechasando esaki su proposishon pa saka palestinonan i laga Merka manehá e área di Gaza…
RIAD, Saudi Arabia (AFP).- Sinku pais árabe lo reuní dia 20 di febrüari na Saudi Arabia pa traha riba un reakshon komun riba e proposishon di Donald Trump pa saka e poblashon palestino for di Gaza i rekonstruí e teritorio bou maneho norteamerikano.
E kumbre, ku lo reuní dirigentenan di Arabia Saudita, Egipto, Catar, Emiratonan Árabe
Uní i Hordania, i tambe lo konta ku presensia di Outoridat Palestina, “mester eksaminá e profundidat dje plan di Trump i traha riba un reakshon árabe”, segun un fuente a indiká.
E presidente di Merka, kende a traha un fortuna komo promotor inmobilario, ta proponé pa pone Gaza bou di kontròl di Merka i saka su abitantenan, pa kombertí esaki den un área di kosta di Medio Oriente.
E paisnan árabe di forma unánime a rechasá e idea aki, ku tin komo meta pa saka habitantenan for dje strook di Gaza i manda nan e.o. Hordania i Egipto.
E Sekretario di Estado norteamerikano, Marco Rubio, djaweps a deklará ku Merka ta habrí pa proposishonnan di paisnan árabe riba destino dje teritorio palestino, kaminda tin un periodo di pas for di 18 di yanüari entre Israel i Hamas despues di 15 luna di guera.
Rubio a duna di konosé di ta spera na diskutí e ideanan aki durante un gira ku lo hib’é Arabia Saudita i Emiratonan Árabe Uní, i tambe Israel.
