Deloitte a trata ‘Succesion Planning’
WILLEMSTAD.- Organisashonnan no mester warda te ora un direktor òf otro lider importante ta bai ku penshun òf ta laga su puesto. Planifikashon di suseshon mester ta un proseso kontinuo! Deloitte un bia mas a presentá un tema ku na demasiado okashon hende, organisashon i asta famia no ta tene kuenta kuné i despues e por bira un problema serio. Liesbeth Mol, Julian Lopez Ramirez i Martijn van Rensch a trata diferente parti relashoná ku planiamentu di suseshon adekuá.
Liesbeth Mol ta presidente interino di Deloitte enkargá ku Oropa Mediano Oriente i Afrika, miéntras ku Martijn van Rensch ta partner den Deloite spesialisá e.o den negoshi di famia. Julian Lopez Ramirez ta senior partner ku spesialidat riba e parti di belasting. Deloitte ta enfatisá ku pa prepará e lidernan di futuro mester kuminsá ku nan preparashon awe. Pa logra kontinuidat den empresa ta vital pa e plan di remplas’é ta unu duradero.
E ekspertonan di Deloitte a splika ku por tuma tres pa kuater aña pa prepará kandidatonan na un forma adekuá.
Esaki ta èkstra importante na Kòrsou i Aruba komo ku ta trata di islanan chikitu. Riba e islanan aki, e grupo di posibel kandidato pa posishonnan di liderato ta limitá. P’esei organisashonnan no mester buska outomátikamente den eksterior. Nan mester mira tambe hende ku tin talento i potensial dentro di e organisashon i riba e otro islanan. Podisé e kandidatonan no tin tur e eksperensia nesesario ainda, pero nan por sigui desaroyá.
Un bon proseso di suseshon mester ta fleksibel, transparente i ophetivo. Empleadonan i otro personanan envolví mester komprondé e reglanan, e diferente pasonan i e desishon final. Evaluashon independiente por yuda pa evaluá tur kandidato di un manera hustu.
Un organisashon por kuminsá ku un grupo amplio di kandidato. Despues ta traha un lista largu, un lista kòrtiku i finalmente ta skohe e mihó kandidato. Kandidatonan mester haña formashon, eksperensia, kontaktonan i guia. Nan mester bira mas visibel tambe paden i pafó di e organisashon.
E guia mester sigui despues ku a skohe e lider nobo. Solamente un persona por haña e funshon. Pero e organisashon no mester trata e otro kandidatonan komo pèrdèdó. Nan tambe ta importante pa futuro di e organisashon.
Empleadonan mas hóben ta buska lidernan outéntiko, resiliente i empátiko. Nan ta duna balor na un lider ku por reflehá riba dje. P’esei, un organisashon no mester buska simplemente un vershon mas hóben di e lider aktual. Futuro di e organisashon por tin nesesidat di otro kualidatnan, manera mas konosementu di teknologia, inovashon i kolaborashon internashonal.
Hunta di supervishon mester vigilá e proseso. Mester ta kla kua ta e papel i outoridat di kada persona. Presidente di e hunta mester sostené e kandidatonan, krea espasio pa reflekshon i tene atenshon pa largu plaso. Mester mantené e reguladónan informá durante henter e proseso tambe.
