WILLEMSTAD.- “Kumpli ku lei pa bo keda drei”, esei ta e lema ku ta konta pa tur negoshinan den e temporada aki.
Sr. Ronny Cornelis a duna di konosé na EXTRA ku ayera e tim konsistiendo di brantwer, inspekshon di seguridat di SOAW, UBW i MEO a kuminsá kontròl dirigí riba tur lokalidat spesialmente esnan den horeca ku ta riba ruta di karnaval. E kontròlnan previo aki ta pa garantisá pa tur kos ta na lugá na e establesimentunan, esta ta duna informashon na diferente horeca nan ku falta di kumpli ku sierto medidanan i kondishonnan. Spesialmente loke ta trata seguridat di brantwer, seguridat di inspekshon di labor, UBW i MEO, e parti di e lei di mantenshon di órden i tambe di pèrmit. Seguidamente despues di e promé ronda di kontròl lo hasi un “follow up” pa mira si e instrukshonnan ku a keda duná na e diferente establesimentunan di horeca a keda kumplí. Esaki ta pa garantisá ku durante di marcha e punto di salida ta ku tur hende ta habri, i generá entrada.
Manera ta konosí kaba nos ta bini for di un situashon ekonómiko no 100%, i aparte di esei tabatin 2 aña ku no tabatin karnaval.
P’esei kontròlnan previo i durante di marcha. Durante marchanan ta kontrolá tur esnan ku a haña pèrmit pa aktividat komersial durante marchanan i esnan ku ta kana bende kos. Nan lema pa ku pèrmit ta “Kumpli ku lei pa bo keda drei”.
Ayera henter dia a kontrolá, e próksimo kontròl ta otro siman. Ta chèk wak kon leu tur hende a yega pa ku e ahustenan pa ku lei. Tambe previo na e marchanan lo kontrolá tur establesimentu.
