Entre miembronan i direktiva
WILLEMSTAD.- Tin otro diskushon promé ku reunion general di Partido Nashonal di Pueblo (PNP) ku mester tuna lugá awe 4 di mei pa 4’or di atardi. Ta trata di diskushon fondo di miembronan i ken por asistí na e reunion.
Direktiva a manda un lista rònt ku nòmber di tur miembro. Ta trata di un lista ku alrededor di 202 nòmber. Konforme statuto esaki ta nifiká ku mitar di e kantidat di miembro registrá, esta 101 miembro plùs 1, pues total 102 miembro, mester ta presente pa e reunion por sigui.
Na mes momento direktiva ta indiká den un mensahe ku a manda rònt ku miembronan por partisipá na e reunion solamente si a kumpli ku tur pago di kontribushon te ku luna di aprel 2026. Ta urgi miembronan pa nan mes kontrolá ku nan atministrashon pa asina nan tin sigur si nan a paga. E kuórem di mitar plùs 1 ta algu ku segun Lucia mes ta indiká no a logra durante último añanan. Konsekuentemente e chèns tei ku awe no ta logra sera e kuórem pa e reunion por sigui ku e konsekuensia ku mester posponé esaki.
E miembronan di PNP ku a bin ta mustra riba loke na nan opinion ta mal maneho di parti e direktiva di partido, ku pa kolmo no ta legal, ta indiká den un reakshon riba e mensahe di direktiva ku PNP no tin mas ku 120 miembro registrá i a urgi pa den wikènt tras di lomba mes direktiva mail e lista ku tur 202 nòmber di miembronan registrá. Mas aleu e miembronan malkontentu ta indiká den un karta ku tur miembro ku ta registrá por partisipá na e reunion. Ta solamente na momento ku surgi puntonan durante di e reunion ku mester vota riba dje, t’asina ku solamente miembronan ku a paga kontribushon por vota.
Segun ta sigui trese dilanti, tin miembro ku despues di e mensahe di direktiva riba kuórem i pago di kontribushon, a tuma kontakto ku (èks) tesorero di partido pa informá si nan tin kontribushon atrasá. E tesorero lo a informá e miembronan ku e no ta forma parti mas di e direktiva i a traspasá tur relato finansiero na direktiva di PNP i pa tuma kontakto ku e direktiva. Finalmente miembronan ta rekordá direktiva di PNP ku a pidi un reunion general di miembresia pasobra direktiva no ta kumpli ku statutonan di partido.
Miembronan a ekspresá nan preokupashon riba e situashon aki na diferente okashon pasobra na nan opinion ta trata di un situashon grave. A instruí presidente di direktiva pa atendé riba e situashon aki, pero sin resultado pero segun nan punto di bista e no a duna resultado. E situashon reinante segun e miembronan no ta kuadra ku ideologia di PNP i no por kontinuá asina mas.
Manera EXTRA a informá siman pasá ta asina ku den e karta di 28 aprel 2026 na direktiva di PNP, a pidi presidente, Dudley Lucia pa e tuma su retiro. E karta ta bisa literalmente: “Konsiderando:
- ku direktiva no ta kumpli konforme artíkulo 22.3 di statutonan di PNP
- presidente no a kumpli ku artíkulo 28 di statutonan di PNP
ta pidi presidente pa boluntariamente di forma inmediato tuma su retiro komo presidente di PNP.
