WILLEMSTAD.- Ayera atardi funshonarionan di MEO huntu ku BAB i GMN mester a bolbe sera otro establesimentu chines debí na situashon a higiéniko ku a keda deskubrí.
Na nan yegada a topa ku e restorant yen kliente wardando nan kuminda. Na momentu ku a bai kontrolá e kushina, a konstatá ku a harma e kushina den e loke ku mester ta e bodega.
Aparte ku e kushina ta hopi a higiéniko i no ta ekipá komo un kushina di forma responsabel, tabatin basta bon di gas warda den e “kushina” loke ku ta forma un situashon di peliger tantu pa e doñonan mes, komo kliente. Tampoko e parti di BAB no tabata na òrdu.
Mirando tur esakinan a sera e establesimentu i e lo por habri bek te dia nan limpia kompletu i hasi e ahustenan nesesario.
