Malcolm Helmijr
Despues di konosé pa basta aña, nos a invitá Malcolm Helmijr den nos programa di Djasabra pa e konta nos kon bin e ta den kushina. I for di loke el a konta Djasabra por konkluí ku kushina ta su pashon. Kuminsando for di chiki, ora tur mucha tabata hunga pafó, e tabata den kushina serka su mama i grandinan ta kushina.
Fo’i chiki den kushina
Pa Malcolm tabata un plaser pa kompartí ku nos su historia pasobra asina e por ta un ehèmpel pa otronan tambe ku ke yega kaminda ku e tambe a yega awe. E tin un trayektoria largu. E ta bin di un famia di 9 ruman, 7 hòmber i 2 muhé. Banda di su kas tin un fèlt ku tur atardi su rumannan ta bai hunga sea beisbòl òf futbòl pero esei no tabata interes’é. Malcolm tabata den kushina banda di su mama preparando kuminda pa su rumannan. E ta wak kiko su mama ta hasi, for di 11 aña. E ta mira su mama kushiná ku hopi amor. Un sentimentu di pashon ku e tambe ke ta manera su mama kushinando. Su mama ta kushina ku e smak ku e tin di pone den e kuminda. I tin bia si e kuminda no tin smak, Malcolm mes ta kaba di drech’e na su manera i ora e laga otro purb’e, tur tabata gust’e. Asina segun Macolm el a lanta ku e pashon pa kushina. Ora el a kaba su klas 6 el a bai MAVO pero e no ta hende ku ta gusta sinta den klas i tampoko e tabata gusta e lèsnan. El a bai klas 2 i el a keda sinta tres bia i nan a bis’e e no por keda e skol. El a bai e tempu ei MAVO 3m3 i el a pasa èksamen pero pa un punto e no por a bai klas 4. E no a kibra, pasobra el a mira i sinti amor pa algu ku ta kushina. El a kita for di skol i a bai otro MAVO pero no a bai bon. Algu a bis’e pa mihó e buska pa haña un fiansa di estudio i el a hañ’e pa e por a bai studia Hotel Vakschool Bushiri na Aruba, Ta promé bia ku el a subi avion. Einan el a bin ripara ku tur loke e no tabata komprondé na MAVO, awor si el a bin komprondé. Kushinando den dia i bai lès anochi.
Di Aruba pa Merka
Siendo na Aruba, Malcolm a topa ku un shef ku a kere den dje. E shef a bira su amigu i riba djabièrnè nan dos tabata dal algun drenks ounke semper tene e komo alumno i shef separá for di otro. Serka su shef el a haña kátedra di kushina i asina a prepará su mes. Siendo na Aruba, e tabata hasi su práktika den un restorant di un di e hotèlnan di e isla kaminda el a topa un pareha merikano. E ta kòrda kon el a sirbi nan kaminda el a kometé un eror di sirbi e hende hòmber promé ku e hende muhé. El a rektifik’é mesora i a pidi despensa. Esaki a pone ku e pareha a haña masha simpatia pe. Nan a puntr’e kiko ta su plannan pa futuro i el a papia di su soño pa un tempu por bai studia na Merka i den e kaso aki New York. E pareha a bai Merka i algun tempu despues Malcolm a haña aplikashon di e skol na Merka. Na momentu ku el a kaba na Aruba, el a haña su pasashi, el a haña un estudio pa e siña ingles i e skol a tum’e kaba pero e mester a haña e kurso di ingles promé. Asina Malcolm a bin Kòrsou, ku su 19 aña kaminda el a informá su mayornan i asina a subi pa Merka. E pareha mes a top’e na Aeropuerto pa despues e bai Campus di e skol pa por sera konosí ku e otro studiantenan. Asina el a drenta skol di kokí na Merka.
Esun komo ehèmpel
Malcolm a sigui konta su historia bisando ku na Merka e tabata keda skohe komo esun ku tin di kushina pa eventonan di e militarnan. Den hopi di e trabounan, e tabata keda skohe. E shefnan tabata gusta su estilo. E kos a bai asina leu ku ora e tin di traha su “papernan” pa skol, e tabata keda den su kamber pa hasi esaki. Loke a hala su atenshon ta ku nunka e ta haña su “papernan” bèk, i a resultá ku tabata usa su dokumentonan pa e otronan. Esaki a motiv’é pasobra el a sali for di un isla, esaki ta su soño, su pashon ku e no por a logra na Kòrsou pero pafó di Kòrsou si el a logra. Malcolm su skol tabata na Rhode Island.
Kokí na Euro DISNEY
Durante di su periodo na Merka, e tabata kore stazje na diferente otro lugá manera na DISNEY. Malcolm mester a keda 4 aña pero el a terminá su estudio muchu mas lihé den 3 aña. E promé 2 aña el a haña e arte kulinario di mainta te atardi. E por a sigui diferente área i a skohe pa Food service management. El a kaba ku su “bachelor” i tabata nèt e aña ku Euro DISNEY tabata bai habri. Nan a bin reklutá studiantenan i e tabata e úniko di e skol ku nan a skohe pa traha, E kier a hasi esaki pa 1 aña pasobra e kier a bin Kòrsou bèk. El a traha einan den e hotèl New York. Den su promé luna einan el a sali empleado di luna, ku tabata mas motivashon pa Malcolm ainda.
Kòrsou ta mi lugá
“Kòrsou ta mi lugá, mi hendenan, mi kultura” i Malcolm a bai bisa su shef ku e ke bai Kòrsou. E shef a hasi tur kos posibel pa e no bai entre otro hisa su salario, pero e kier a bai su isla bèk i nada por a par’é. E ta kòrda ku el a bin Kòrsou pa entiero di su wela i ta nèt momentu ku hotèl Sonesta tabata bai habri. Nan a pidié pa yuda ku e apertura pa 3 siman. Tabata un desishon difísil pe i el a manda un karta pa su shef ku e ta keda Kòrsou.
Di hotèl pa skol
Malcolm semper a bisa ku e no ke traha pa hende komo kòki pero e ke hasié pa e mes. El a traha pa 2 luna asistente den restorant i despues enkargá ku set up di tur e salanan. Esei tabata loke el a gusta i el a hasié pa 5 aña. Despues el a sali di einan kaminda el a traha diferente otro kaminda entre otro Avila Hotèl, kaminda el a bisa F&B Manager. Ku tur esaki segun Malcolm por mira su amor pa kushina i e parti di servisio. Einan el a keda te 2001 i despues e mester a bai over na pasa konosementu over.
Nunka entrega
Malcolm a sali for di hotèl i a bai skol. E no a siña pa e rango pa dosente pero tabata buska hende pa Bedrijfsleven. I a buska hende ku añanan di eksperensia pa pasa esaki over. I esaki a habri porta pa Malcolm. El a konosé e diferente trayektonan di skol manera MBO, VSBO, SBO, VMBO. I pa Malcolm e ta gusta wak bèk i kompartí ku su studiantenan kon el a progresá den bida. E ta laga nan komprondé ku e no tabatin e fásil. E no tabata e mihó alumno ni studiante pero nunka el a entregá. Semper Malcolm ta bisa su muchanan ku si nan tin pashon pa algu, nan sigui pusha. I el a haña sosten di su mayornan semper i esaki ta su fruta.
Siña mucha spesial
El a duna mucha grandi i mucha chikí, esun mas kapasitá ku otro. Semper komienso na un reto i segun ta bai ta habri kaminda ku loke e mester pa atendé ku e tipo di studiante òf partisipante e ta haña algu pa apliká. El a traha na SBO 16 aña i a sali un aña bai hasi algu otro. Ora e kier a bai bèk no tabatin espasio pe pero tabatin 3 skol spesial ku a aserk’é. El a tuma e tres nan ei. Na dos di nan e no a mira e struktura unu ideal. Muchanan spesial bo tin di siña pa sa kon dil ku nan. I finalmente el a keda na Blenchi skol. Pero miéntras tantu a habri oportunidat na un VSBO tambe ku ta su lugá. Tambe e ta duna lès na un kompania. Eseinan ta tres pia, esta e skol spesial, VSBO i e kompania i kada un ta kompensá e otro i forma un kadena ku e por apliká. I e ta un dosente orguyoso di traha ku tur tres pia.
Oportunidatnan pa representá Kòrsou
Malcolm tambe a duna guia na partisipantenan pa representá Kòrsou den eksterior, den e kaso aki pa Tast òf the Caribbean. Esaki tabata algu bon pa e hubentut. E tabata bon pasobra muchanan di skol tabata kompetí kontra di restorantnan. Awe e ta wak fruta di e studiantenan aki entre otro Carlos Antonij ku a progresá masha bon mes riba tereno di kokí. Tambe Malcolm a yega di representá Korsou na Martinique i tambe na Rio Hacha. I einan e por a demostrá kiko e kushina di Kòrsou tin aden. Malcolm ta konvensí ku loke bo ta duna di bo mes, bo ta haña bèk di un forma inkreibel.
Su kuminda preferí
I den su mas di 40 aña komo kokí, Malcolm a konta nos kua ta e kumindá ku mas e ta gusta kushiná. I esaki ta Lasagna, asina el a bisa nos sin pensa muchu. Esaki ta su spesialidat, e ta drumi soña kuné.
E yamada
Riba nos pregunta si nunka e la pensa di habri su restorant el a kontesta ku den bida bo tin di sinti ku bo ta apto pa algu i e ta un yamada. Hopi ta yama pero poko skohe. E no ta sinti pa habri un restorant pero e ta sinti pa pasa su konosementu over. Ta yen’e ku orguyo ora e mira esun ku a pasa bou di su alanan, kon leu nan a yega. I p’esei e ta hasi su máksimo esfuerso pa guia e hóbennan. I ta masha remarkabel ku e ta haña mas studiante mucha hòmber pa bai den direkshon di kushina. E mucha hòmber ta kreativo i e ta mira kushiná algu pa e sigui padilanti kuné den bida.
E plato
I ora bo bestèl bo kuminda, ku e ta biniendo den bo direkshon, e kolonan mester ta yamativo i trese e un sonrisa. Esei ta e promé impreshon. Na di dos lugá e presentashon di e plato ta importante. E por ta riba un tayo tur shusha òf no a laga e karni sosegá, i ta bin aserka e inovashon i e smak bo tin di sinti salu, sut, beter, zür, algu manera gèmber den dje. Tur eseinan ta lanta e sabor.
“Tur lokual bo a traha pe ku sodó di bo frenta, ku bo mannan a mishi kuné, kere mi ta un satisfakshon inmenso ku bo ta haña”, tabata palabranan di Malcolm Helmijr.
