Movich Buró 26 Bogotá: E promé parada
WILLEMSTAD. – Bogota. – E promé parada di biahe tabata Movich Buró 26 na Bogotá, kaminda Avianca, IDT (Instituto Distrital de Turismo) i Movich Hotels a risibí nos. E tim a ser bon biní ku un prueba di hospitalidat kolombiano, kuminsando for di porta ku limonada de panela, e limonada tradishonal dushi ku panela.
Durante almuerso, kushina regional tabata den sentro di atenshon: Ajiaco Santafereño, e kuminda emblemátiko di Bogotá. Ta un sòpi prepará ku diferente tipo di batata di e region, galiña sasoná ku e yerba ‘guascas.’ Na mesa ta añadí krema i kapar segun smak i ta sirbi’é ku maishi hinté, aros blanku, pernil i awakati. Un introdukshon apropiá na kultura kulinario di e kapital, promé ku e grupo a sigui rumbo pa La Vega.
E parada tambe a marka e promé entrevista formal di e biahe. Annabelle Otero, Sup Direktora de Merkadeo di Bogotá (IDT), a papia tokante dikon Bogota i La Vega ta e destinashonnan perfekto pa biaheronan di Karibe. Tambe el a splika kon e konekshon mihó ku Avianca awor ta pone e destinashon fásil pa alkansá for di Kòrsou.
For di Movich, e delegashon a subi bùs pa kue direkshon di La Vega.
La Vega: “Kua ta e último biaha ku bo a invertí den bo bienestar?”
Bogota.- E nòmber La Vega kasi outomátikamente ta hasi bo pensa riba un otro
destinashon mundialmente konosí: Las Vegas. Pero kita e dos ‘S’-nan for di Las Vegas i bo ta haña La Vega. No ta solamente e nòmber ta kambia; e tipo di apuesta tambe.
Las Vegas ta konosí pa su kasinonan, lusnan i weganan di azar, kaminda tur kos ta drai rondó di suerte i e posibilidat di gana òf pèrdè. Na La Vega, Colombia, e bèt ta riba algu kompletamente diferente:
Miéntras e delegashon ta laga e movimiento di Bogotá atras i drenta mas aleu den Cundinamarca, e paisahe a kuminsá kambia. Serunan bèrdè, vegetashon, aire fresku i un ambiente mas trankil ta tuma lugá di e ritmo rápido di kapital. La Vega ta presentá su mes komo un destinashon kaminda naturalesa, aktividat físiko, gastronomia, deskanso i bienestar ta forma parti di e eksperensia.
Esei ta duna e komparashon ku Las Vegas tin un signifikado interesante. Na un destinashon bo por tuma e riesgo di pone bo plaka den wega sperando ku suerte ta na bo banda. Na e otro, bo ta invertí tempu den bo propio bienestar.
Las Vegas por puntra bo: ‘Suerte ta na bo banda?’
La Vega ta hasi bo un otro pregunta:
‘Ki dia tabata e último biaha ku bo a invertí den bo propio bienestar?’
