WILLEMSTAD – Un konosido elèktrishèn a lanta awe mainta ku un problema grandi, despues ku ladron(nan) a kibra den su vèn na Granaatappelweg den Dominguito i a bai ku gran parti di e material ku e ta usa diariamente pa hasi su trabou. Polis mester a akudí na e negoshi den oranan di mainta trempan despues ku a deskubrí e robo.
Segun informashon ku EXTRA a risibí, e ladron lo mester a logra kibra drenta e vèn di e elèktrishèn i despues pluma e vehíkulo. Entre loke a keda hòrtá tin diferente material i hèrmènt ku e elèktrishèn ta usa pa su trabou, inkluyendo un kantidat grandi di fius ku e tabatin den e vèn pa por atendé su klientenan.
E robo ta pone e elèktrishèn den un situashon difísil, ya ku awe mainta e ta sin gran parti di e material ku e normalmente ta usa pa sali hasi su trabou i kumpli ku sita di su klientenan.
Sinembargo, e ladron lo por a laga pista importante atras. Na e sitio tin vários kámara di seguridat ku, segun informashon, a logra kaptá imágen di e sospechoso i tambe di e outo ku lo a keda usá durante e robo. Polis awor tin e imágennan aki disponibel komo parti di investigashon. Nan por resultá importante pa trata di identifiká e sospechoso, logra un detenshon i eventualmente rekuperá e material di trabou ku a keda hòrtá. Te na e momento aki no ta konosí e balor total di e material ku a keda hòrtá.
