Update: Eksploshon ATM ta trese peliger serio pa hendenan den bisindario

WILLEMSTAD.- Polis ta konfirmá e eksploshon di dos ATM awe mardugá i ta indiká tambe ku a haña dos outo kima na Banda Bou na altura di Willibrordus, pero te ainda polis no por bisa ku seguridat ku e outonan aki lo ta relashoná ku e kaso di bulamentu di e dos mashinnan di plaka. E bosero polisial sr. Imro Zwerwer den deklarashon na EXTRA ta mustra riba un aspekto hopi importante ku hopi hende kisas no a tene kuenta kuné. Den e kaso aki ta trata e aspekto di seguridat.

Zwerwer a sigui splika ku e echo ku e kasonan a tuma lugá kasi simultaniamente por nifiká ku sea tin dos grupo diferente of ta trata di un grupo ku ta konsistí di mas hende. Siman pasá tambe a tuma lugá un intento pa rementá e ATM na Marchena. Polis a tene kuenta ku e desaroyo aki mirando ku den último añanan e bulamentu di ATM ta algu ku ta lanta kabes, meskos ta konta pa bankonan tambe ku a tuma medidanan.

Pa loke ta trata e modus oprandi, polis tambe ta mira ku esaki ta mesun kos den tur kaso esta ku ta pasa un slan ku ta sali di un bòm di gas pa asina rementá e ATM. Ta aki ta surgi e aspekto di seguridat ku sr. Zwerwer ta referí na dje.

Kuerpo polisial ta teme pa bida di hende den e kasonan aki. Riba su mes e intento pa rementá e mashin di plaka ta un echo kastigabel pa lei. E preokupashon mas grandi ta e peliger pa hende i propiedat alrededor di e mashin di plaka. E peliger ta konta tantu pa e malechor mes komo hendenan ku den bisindario. Ta un eksploshon ku gas i por yega hopi leu, sigur den áreanan ku tin kas of hendenan ta kana pasa eibanda, asina Zwerwer a deklará na EXTRA.

 

A bula dos ATM na kasi mes momento

WILLEMSTAD.-Malechornan a rementá dos mashin di plaka di dos banko diferente awe mardugá. E informashon preliminar ta mustra ku ta trata di un ATM di Banco di Caribe na altura di Arco Iris i e otro ta di MCB na e filial na Jan Noorduynweg. EXTRA tin informashon ku a logra habri e ATM di Banco di Caribe pero esun di MCB si no a logra.

Tur kos ta mustra ku ta trata di un akshon plania debí ku ámbos kaso a sosodé práktikamente na mesun momentu. Ámbos kaso a sosodé algun minüt pa 5’or di mardugá ku sentral di polis a risibí e informashon ku malechornan a bula e mashinnan di plaka.

Informashon di último ora ta indiká ku outoridatnan a haña dos vehíkulo kompletamente kimá den área di Curaçao Oil Terminal (COT). Tin indikashon fuerte ku probablemente e dos vehíkulonan aki lo a keda usá den e ladronisia aki.

SHARE

LEAVE A REPLY