WILLEMSTAD – E problema di ladronnan ku ta kita piesanan di outo ta sigui manifesto i awe tabata den e bario di Mahaai pa mas eksakto den Pimpiriweg. E situashon ta sigui empeorá dia pa dia. Viktima nan di kaso di robo di piesanan di vehíkulo ta bira kasi un kos di tur dia, poniendo preokupashon grandi entre doño nan di vehíkulo.
E último insidente ku polis ta na altura di dje a sosodé na Pimpiriweg, kaminda turista Brasileño a lanta mainta ku un sorpresa desagradabel. Ora nan a sali pa wak nan outo, nan a deskubrí ku ladronnan a kita porta kompleto di nan Toyota Agya. Den e kaso aki ta kibra glas di un banda di e outo pa por drenta i asina bai ku e porta di otro banda ku no tin daño na dje kousa.
Esnan ku ta kubri aktividatnan polisial mesora a nota ku esaki ta e promé biaha ku un Toyota Agya ta bira víktima di e tipo di krímen aki. Te awor, ladronnan tabata mas enfoká riba otro modelonan di outo pa kita piesanan ku despues por ku tur probabilidat rebendé.
E ladronnan a bira ta operá sin ningun tipo di miedu i insidentenan ta sosodé regularmente durante anochi. Vários víktima a reportá diferente kaso den pasado, pero ku e problema ta sigui persistí.
E kaso aki ta no solamente afekto e doñonan di vehíkulo, pero tambe por tin un impakto negativo riba turismo. Pa e turista Brasileñonan, e eksperensia desagradabel aki ta un kos ku probablemente lo keda den nan memoria durante hopi tempu.
Polis den pasado a rekomendá pa doñonan di outo tuma medidanan adishonal di seguridat i pa reportá kualkier aktividat sospechoso na polis mesora.
