Tsnatee Elisa
Den un mundu ku ta modernisá ku velosidat, ta importante pa komprendé kon pa krea bo ‘personal brand’, un marka personal ku ta laga hende rekonosé bo di tal manera ku bo ta keda den nan mente. Pa elaborá riba e tema akí, djasabra a sinta ku Tsnatee Elisa, un hóben profeshonal ku tin un trayekto inspirativo. El a biba un temporada na Kòrsou, sigui su estudio na Hulanda i Inglatera, i biaha rònt mundu pa amplia su perspektiva. Den e kòmbersashon, ku tabata inspirá dor di su diskushonnan riba TikTok, a toka e punto esensial riba marka, LinkedIn, i e manera kon adaptashon i modernisashon ta fundamental pa nos hendenan.
Ken ta Tsnatee?
Tsnatee ta un yu di Kòrsou. El a nase aki nan, pero ku seis aña su famia mester a bai Hulanda, despues ku su tata a skohe pa sigui un estudio den eksterior. Nan a biba kuater aña na Hulanda. Despues di e 4 añanan, Tsnatee i su famia a regresá Kòrsou. El a bai Marnix College i a sigui su VWO na Radulphus College. Su trayekto akadémiko a desaroyá di un manera impreshonante. Tsnatee a bolbe pa Hulanda pa sigui e estudio di Business, el a bai Inglatera pa sigui Finance i International Management, i eventualmente a traha den tim di marketing di Heineken. El a kuminsá komo un simpel stazjèr, pero na e momentu akí Tsnatee a deskubrí su pashon berdadero: ‘International Marketing’ (merkadeo internashonal). E inspirashon a kue su atenshon pa sigui un Master na Vrije Universiteit Amsterdam den Brand Management i Strategic Management.
Talentonan kreativo
Promé ku tur esaki, desde chikitu Tsnatee ya tabata hasi uso di su talentonan kreativo. E tabata krea programanan di su mes, inkluso ‘jingle’ i grabashon, i invitá famia pa sinta wak lokual ku el a produsí. Den e proseso e tabata pensa den promoshon di e programa, pone su preis i inkluso kon pa hasi ganashi. Esakinan a forma su interes den merkadeo. E inspirashon mas grandi pa a skohe e rumbo final akí ta ora el a topa ku ‘branding’ di Heineken. Un detaye masha chikitu ku Freddy Heineken a skibi den e strategia, un sonrisa ku ta identifiká ku e marka pa medio di un di e lèternan den e palabra Heineken. Esaki a proba ku ‘marketing’ ta mas ku un negoshi, e ta kreatividat, identidat personal i un forma di krea bo futuro profeshonal. Tur e eksperensianan aki huntu a forma Tsnatee su pashon pa merkadeo.
Merkadeo Personal i pa empresario
Merkadeo ta fundamental, no solamente pa un empresa, sino tambe pa un individuo. Manera Tsnatee a splika: “Ora bo no ta presente den un kamber, i otro hende ta papia di bo produkto òf servisio, lokual nan bisa ta e manera ku nan ta asosiá ku bo marka. I si e impreshon no ta positivo, òf no ta konsistente ku loke bo ta ofresé, e ora ei bo no ta bende bo produkto manera mester.” Ku e pensamentu akí, Tsnatee a krea su negoshi pa yuda tantu personanan komo negoshi drecha nan ‘visible personal brand’, loke hende ta mira. Di e manera akí, kada bia ku hende mira bo produkto òf servisio, nan sa mesora kiko bo ta ofresé i kiko ta e balor. Pa Tsnatee, merkadeo personal ta muchu mas ku loke bo pone di bo mes riba medianan sosial. E ta dividí esaki den tres nivel:
Mental: kiko bo ta kere di bo mes, kiko bo ta papia di bo mes, kiko ta bo motivashon i kiko ta bo meta den bo karera personal.
Físiko: kon bo ta presentá bo mes na mundu, di e manera kon bo ta bisti, ta kana drenta un lugá, òf un gesto simpel manera kon bo ta saludá.
‘Online’: kiko hende ta mira ora nan buska bo nòmber riba Google òf lokual ku bo ta publiká. Bo mester ta kouteloso ku e parti akí, pa e informashon ‘online’ no keda atrasá den tempu, ku informashon di bo ku ya no ta representativo pa ken bo ta awor. “E klave,” Tsnatee bisa, “ta ku e tres nivelnan ta un kombinashon: bo mentalidat, bo presentashon físiko i bo imágen ‘online’ mester keda aliniá.” I den e mundu profeshonal, su plataforma preferí pa kuida e último nivel ta LinkedIn, komo e ta e vitrina global pa merkadeo personal.
‘Rebrand’: Fásil òf difísil?
Ora nos ta papia di merkadeo, e ta mustra fásil. “Pa empresanan ku tin hopi aña di eksistensia e ta un tiki difísil”, Tsnatee ta bisa. Segun Tsnatee, ‘rebrand’ no ta semper asina simpel. “Bo tin e parti di ‘personal rebrand’ i e parti di ‘rebrand’ di un negoshi. Hopi bia, un kompania ta den su zona konfortabel, i esaki ta krea e desafio.”
Tsnatee ta bisa ku un ‘rebrand’ total, di A te ku Z, por krea deskonekshon. “Hendenan mester por identifiká nan mes ku e kompania ku nan a konosé di ántes. Si bo kambia logo, e tipo di lèter òf ‘slogan’ kompletamente, tin e rísiko ku hende no ta identifiká nan mes mas ku e produkto òf servisio. E promoshon por krea desbentaha.”
Pa evitá esaki, Tsnatee ta rekomendá pa semper laga un tiki di e identifikashon bieu den bo ‘rebrand’. “Puntra bo mes tur ora: kiko hende ta gusta di mi negoshi? Kiko ta interesá nan? Ora nan tende di mi, kiko ta laga nan kòrda riba mi marka?” E reflehonan aki ta duna un klaridat pa bo komprendé te kon leu bo por bai ku e ‘rebrand’.
“Tur hende por hasi un ‘rebrand’,” Tsnatee ta sigui, “pero e ta dependé di bo oudiensia i kon nan ta sinti kon leu bo por bai.”
Kon e proseso di LinkedIn ta funshoná
Tsnatee ta splika ku LinkedIn ta básikamente mesun kos ku un página di Facebook òf Instagram, pero e enfoke ta diferente. “LinkedIn ta pa tur hende ku ta den un karera. Mesun manera ku bo ta skròl riba otro plataforma, asina tambe bo por skròl pa bo karera,” e ta bisa.
Riba LinkedIn bo por haña negoshantenan, ‘recruiters’, invershonista, i tur hende ku tin un relashon ku mundu di trabou. Segun Tsnatee, hopi hende ta bisa ku nan no ta sinti nan mes konfortabel riba LinkedIn, pasó nan ta haña ku e plataforma ta solamente pa papia di trabou. “Nos a kustumá ku Facebook òf Instagram pa konta kiko nos ta hasi den nos dia diario. Pero LinkedIn ta enfoká totalmente riba bo trabou i bo karera. I hopi hende no ta sigur si esei ta algu pa nan òf nò.”
Tsnatee ta bisa ku un parti di su trabou ta pa yuda hende sinti nan mes konfortabel ku LinkedIn: “Mi ta yuda hende pa nan por publiká trankil i publiká algu ku ta pas realmente ku nan persona, pa nan sinti ku e ta natural i outéntiko.”
Kiko ta e eror mas komun riba LinkedIn
Segun Tsnatee, e eror mas grandi ku hende ta kometé riba LinkedIn ta lubidá ku e plataforma ta bo ‘personal career website’. “Ora un hende Google bo, LinkedIn ta un di e promé linknan ku lo sali. I si bo perfil no ta kla, bo ta pèrdè un oportunidat grandi,” e ta bisa.
Hopi hende ta trata LinkedIn manera un CV. “E problema ku un CV ta ku e ta muchu seku, un lapi di teksto. Pero LinkedIn tin mas espasio pa un pòtrèt ku ta mustra bo personalidat, un ‘headline’ ku ta mas ku solo ‘recruiter’ of ‘manager’. Kiko ta bo mishon? Bo ke yuda negoshinan haña talento ku tin un relashon komun ku nan? Esei ta e kos ku ta hala bo atenshon.”
E ‘headline’, segun Tsnatee, ta un arma poderoso. “Hopi hende ta laga e bashí, i asina nan ta pèrdè hopi chèns. Hende mester por sinti bo personalidat ora nan topa ku bo perfil.”
Otro eror komun ta ku hende no ta publiká nada. “Tur hende ta ‘like’, pero nos ta duna un komentario. Nos ta pensa: kiko mi por publiká? Mi no tin nada di papia. Pero si bo tin 10 aña di eksperensia na un kompania, esaki ta hopi material pa kompartí. Kiko a inspirá bo pa keda? Kiko bo a siña? Kiko mas bo ke hasi den bo karera?”
Segun Tsnatee, esaki ta loke ta hasi LinkedIn diferente. “E ta krea un komunidat, un lugá kaminda hende por haña inspirashon, guia i konekshon. I e ta kuminsá ku un simpel perfil ku ta mustra no solamente bo trabou, pero bo personalidat tambe.”
LinkedIn na Kòrsou
Tsnatee a hasi un análisis pa wak kon LinkedIn ta desaroyá na Kòrsou. Na e momentu akí, tin mas ku 88 mil persona ku tin un perfil riba e plataforma, ku ta mas o ménos 50% di e poblashon di Kòrsou. “Pero esaki no ta nifiká ku tur hende ta aktivo,” e ta splika.
Den su investigashon, ora el a buska spesífikamente hendenan di Kòrsou, el a mira ku solamente 100 persona ta konsistente ku nan presensia, i apénas 20 persona bo por bisa ku ta realmente aktivo. E resto ta keda den kategoria ku Tsnatee ta yama ‘quiet scrollers’, hende ku ta skròl i wak kontenido, pero nunka nan no ta publiká algu di nan mes.
Aunke e por ta chikí, Tsnatee ta indiká ku e kantidat di usuario aktivo a subi ku 7%. Un señal ku LinkedIn ta un di e plataformanan ku ta krese mas lihé kompará ku otro medianan sosial. “Hopi hende a kuminsá realisá su balor,” e ta bisa.
Su konseho ta pa probechá di usa LinkedIn manera e ta, un porta pa bo siguiente trabou. E ta bo vitrina profeshonal, un lugá kaminda bo por bende bo mes no solamente pa un trabou, pero pa tur posibilidat ku ta bin den bo kaminda. Bo ta na e lugá korekto, pero bo mester habri e porta.”
Eksperensia personal ku LinkedIn
Tsnatee ta konta ku su relashon ku LinkedIn a kuminsá na 2010, ora el a krea su perfil. For di e momentu ei, e plataforma a bira un parti esensial den su trayekto profeshonal. “Tur e klientenan ku mi ta yuda i duna entrenamentu, kasi 90% ta bin direkto for di LinkedIn,” e ta bisa kontentu.
Pa Tsnatee, e no ta solamente un teoria, sino un prueba real ku LinkedIn ta traha. E resultadonan ta papia pa nan mes. E oportunidatnan ku el a risibí pa medio di e plataforma a habri portanan tantu na Hulanda komo na Kòrsou. “LinkedIn tin su balor. Si bo sa kon pa usa e korektamente,” e ta konkluí.
Kua profeshon ta dominá riba LinkedIn
Segun Tsnatee, ta difísil pa bisa eksakto kua profeshon ta dominá LinkedIn, pero si e por mira un tendensia. “Un gran parti di e usuarionan aktivo ta bin for di gobièrnu,” e ta splika. Durante un tayer ku el a duna na Ministerio di Desaroyo Ekonómiko, el a ripará ku hopi di e personanan akí ta usa e plataforma manera un instrumento di ‘networking’ i visibilidat.
Un otro punto importante ku Tsnatee ta señalá ta ku riba LinkedIn, bo ta mira e hende ku bo ta sigui. Esei ta nifiká ku si bo no ta sigui òf interaktuá ku sierto persona, bo no lo mira nan kontenido. “Un manera simpel pa krese bo visibilidat ta komentá. Por ehèmpel, bisa ‘pabien’ òf ‘tremendo’. Esaki por mustra un akto chikí, pero ku tin un impakto grandi. E ta mustra ku bo ta aktivo i interesá den e komunidat,” e ta bisa. Na e momentu akí, LinkedIn su algoritmo ta pone mas atenshon na komentario, i esaki ta habri porta pa mas konekshon.
Guia personal riba LinkedIn
Tsnatee ta konta ku gran parti di su trabou ta basá riba ‘one-on-one calls’, kaminda e ta sinta huntu ku un persona i hasi preguntanan manera: “Ken bo ta realmente? Kiko ta bo meta?.” Segun e ta bisa, “bo por kuminsá ku LinkedIn, pero si bo no tin un mishon patras, lo mustra manera bo ta publiká djis pa pone kontenido sin un rumbo.”
Den seis luna, un persona mester por sa unda e ta mira su mes, tin un destino ku e ke alkansá, kiko bo ke mustra riba e plataforma, i kon bo ke konektá ku otro hende. Ta importante pa traha ku plan di kon bo ta bai desaroyá bo abilidatnan pa konektá, krea publikashonnan ku ta transmití bo personalidat, inkluso krea un seri, manera Tsnatee mes a krea riba Tik Tok “Bula den LinkedIn”, ku ta un éksito.
Historia inspirativo
Tsnatee ta konta un historia inspirativo, kaminda un kliente tabata ke un promoshon, pero su shèf a bisa ku no tin ‘budget’. Despues di un trayekto di guia ku Tsnatee, nan a traha huntu riba e kliente su perfil di LinkedIn. E persona a kuminsá publiká i su shèf a komentá riba e publikashonnan. Esaki a habri e porta pa un diálogo ku e direktiva di e empresa. “Asina e kliente a logra komuniká su balor ku e tabata agregando na e empresa,” Tsnatee ta bisa. Dos luna despues, e persona a haña e promoshon ku e tabata deseá. “Esaki tabata posibel pa medio di e poder di ‘personal branding’. Bo no mester solamente mustra bo abilidat, sino laga hende sinti un konekshon real ku bo.”
Kibra miedu i krea oportunidatnan pa bo mes
Tsnatee ta rekonosé ku ora e tabata krese na Kòrsou, hopi di nos hendenan tin duda, tin miedu di papia fuerte, di mustra nan idea, òf di konta ku nan tin un ‘side business’.” Ta manera un barera, pasó nos ta pensa hopi riba kiko hende ta pensa di mi, òf kon nan lo bai kue i usa mi idea sin duna mi e rekonosementu. Pero, segun Tsnatee, nos mester kibra e tabú di miedu akí. Na momentu ku bo kuminsá habri bo mes, bo ta krea espasio pa mas hende mira bo, i asina oportunidatnan ta keda kreá. “E momentu ku bo papia, bo ta hasi bo mes visibel. I visibilidat ta importante pa bo karera i bo futuro,” e ta bisa.
Na fin di dia, ‘branding’ personal òf profeshonal, no ta solamente riba loke bo ta publiká, pero kon bo ta usa bo bos, kon bo bo ta presentá bo mes, i kon bo ta pone bo mes riba mapa.
Tsnatee aki un par di aña
Tsnatee ta bisa ku un sonrisa ku mesun pregunta ku a hasi djasabra, e ta gusta pone den su entrevista: “kiko ta bo ambishon?” E ta konta ku e ta orguyoso di tur loke el a logra te awor, pero e lista di meta ta grandi ainda. “Mi tin hopi mas kos ku mi ke logra. Un di mi soñonan ta pa krea un programa di entrevista, un plataforma kaminda mi por duna otro hende un bos,” e ta bisa.
Alabes, su meta ta pa sigui krese su negoshi pa yuda hendenan den Karibe, no solamente na Kòrsou, pa nan deskubrí e potensial ‘personal branding’ i loke LinkedIn por hasi.
Futuro di ‘Personal Branding’ na un isla chikitu
Segun Tsnatee, futuro di ‘personal branding’ na un isla chikitu manera Kòrsou ta prometedor. Nos tin un generashon ku a nase i krese ku medianan sosial, i nan ta komprendé e balor ku esaki por duna i e riesgonan ku tin ora bo no ta presentá bo mes na e manera korekto. “E manera ku bo ta introdusí bo mes den bida real, esei mester ta e mesun impreshon ku un hende ta haña ora nan ta skròl riba bo perfil,” e ta splika.
Pa Tsnatee, ‘personal branding’ no mester bira un maskará òf un imágen ku ta mustra un otro vershon di bo mes. E ta atvertí ku introdukshon di inteligensia artifisial, ta mas fásil pa pèrdè e ‘human touch’. Pesei e ta insistí ku nos mester keda kouteloso, i keda inkluí historia i eksperensia real den nos tekstonan, pa mantené e aspekto humano den nos marka personal.
