Laga otro sa ku nos ta hendenan orguyoso

Giorgio Nijhove; Finalista Manhunt Nederland 2026

Otro siman, dia 4 di yüli, lo tin e elekshon pa Manhunt Nederland 2026. Ta trata di un elekshon pa hende hòmber i den e kaso aki nos a papia ku Giorgio Nijhove, un di e partisipantenan finalista. Giorgio tin rais karibense ya ku su mayornan ta di Sürnam i e tin famia na Kòrsou tambe. E mes a nase na Ulanda pero e ke krea e konsientisashon di kuantu kos un hende hòmber por hasi i logra den e tipo di elekshonnan aki i pa krea espasio pa hendenan ku rais karibense.

Un aventura

Giorgio tin 29 aña i semper su ambishon ta pa hasi trabounan di modelá. El a hasi diferente ‘shoots’ i a mira e propaganda di Manhunt diferente bia su dilanti i el a disidí di bai e aventura aki. E ta algu kompletamente otro di loke nan ta kustumbrá di dje for di e aspektonan di kultura. E ta algu otro i nan ta bisa ‘Doe is geks’ i p’esei el a disidí di bai e aventura aki.

Un isla kaluroso

E tin famia na Kòrsou di parti di su tata i ta asina Giorgio a bin den kontakto ku nos di EXTRA. E ta komprendé papiamentu aki aya, aunke e mes ta papia spañó. E no ta papia papiamentu. Giorgio a yega di bishitá Kòrsou 3 aña pasá i el a sinti su mes na kas. E tin hopi di kompará, ta un isla kaluroso i el a sintié hopi mará ku e isla i e kultura i hopi kos ku nan tin igual.

Manhunt

Manhunt mes ta un elekshon pa hende hòmber kaminda bo ta laga sa ken bo ta, ken bo ta komo persona, ta laga mustra bo bida, bo rutina diario i bo desaroyo. E ta nifiká ku hende ta krese den e proseso no solamente den e proseso pero bo ta kuminsá desafiá bo mes i ke pa e hendenan kana ku bo den bo ‘journey’. Esei ta duna e chèns pa wak e aventura i kon e elekshon akí ta. Henter e proseso a dura 3 luna. Na aprel e ‘casting’ a kuminsá i Giorgio ta un di e finalistanan.

Representá Ulanda

Pa a keda skohé den e finalistanan pa Giorgio ta algu grandi. El a bisa ku nunka el a yega di gana algu den su bida i p’esei tabata grandi pa el a sali den e finalistanan i ku aweró e ta bai kana riba esanario dilanti di asina tantu hende. I asina bo tin e posibilidat di resultá un di e ganadónan pa por bai representá Ulanda den eksterior. E elekshon internashonal ta otro aña i e ganadó di 4 di yüli lo bai representá Ulanda na Vietnam.

Laga un stèmpel atras

Nos tabata kurioso pa sa kiko Giorgio ta kere ta hasié un bon representante pa Ulanda. El a bisa ku loke prinsipalmente ta yama su atenshon ta e diversidat, inklushon ku últimamente ta keda muchu mas invertí den nan. Pero e ta haña ku for di e komunidat nan ta bon representá i e ke laga su stèmpel atras pa haña mas hende di koló i pa ta e modelonan pa hendenan di nos kultura, voral di Karibe. Loke Giorgio ke ta pa mustra ku nan tambe ta bria, nan tambe por ta un modelo ku ta bai pa nan soñonan. I esei e ta para p’é.

Hopi sosten

Giorgio no ta e úniko ku un rais Karibense den e tipo di elekshonnan aki pero loke si e ta haña ta ku e ta e úniko ku ta purba kosnan desafiante pa asina tòg ta otro. Manera e tipo di kosnan aki di elekshon di hende hòmber. I e ta haña hopi sosten di hendenan ku ke bai e show. E ta haña hopi pregunta i ta sinti manera ta algu nobo.

Ta krítiko ku bo mes

Otro siman djasabra dia 4 di yüli ta e final di Manhunt Nederland 2026. Giorgio a bisa ku e ta prepará su mes di e siguiente manera: nan a partisipá na diferente tayer i entrenamentu. Nan ta tur ku tin den e preparashonnan di kiko ta bai pasa. E ta wak ken ta su kompetidornan. E ta wak su mes masha krítiko i ta pidi pa hende wak e krítiko. E ke pa si e hasi algu ku no ta bon pa korigié pasobra tin bia ta difísil pa e mes wak kon e ta hasié. E ke ta e mihó. Te ainda den e preparashonnan e no a topa nada ku e no tabata sa di su mes. Loke si e por bisa ta ku tin bia e ta rekonosé sierto kosnan di su mes pero ta poko difísil pa e no tin e dor na e momentu ei i e no sa kon esaki kisas lo por kai serka e hurado.

Kombiná trabou i modelahe

Giorgio ta traha komo Hospitality Security na aeropuerto i tambe pa Human Resource na gobièrnu di Ulanda. I el a haña e forma pa tòg kombiná su trabou ku e elekshon awor akí. El a bisa ku durante di siman e ta traha na Gobièrnu di djaluna pa djaweps i komo Hospitality Security na aeropuerto mas den wikènt i ta kuestion di plania bon pa asina tòg e por logra ku su preparashonnan di Manhunt. Mester tin un bon planifikashon i mas ku tur kos plania delantá.

E vershon mas fuerte di su mes

Kiko Giorgio ke hasi diferente, tabata nos pregunta: El a splika ku e ke ta e vershon mas fuerte di su mes. Tin konfiansa, un hóben di koló fuerte, tantu den su presentashonnan komo den su aparensia i den su personalidat. Tambe e ta haña importante pa tin un bon disiplina. Bo mester sa pa kiko bo ta hasié i ta dirigí. E ke ta lo mihó.

Talento skondí

Pa loke ta su ambishon pa e próksimo 5 añanan el a bisa di ke ta e stèmpel pa hende di koló hóben. E ke nifiká mas pa futuro i pa e hóbennan. E ke ta un ‘role model’ no solamente riba esenario pero tambe ku su historia. E ta sinti ku esei ta hopi yegá na dje i no solamente pa Sürnam i Kòrsou pero pa un i tur. El a bisa nos ku e no tin un talento skondí ku hende no sa di dje. Pero e por bisa ku hopi hende no sa ku e por papia spañó sin aksènt pasobra el a krese ku dominikanonan. Hopi hende ku no sa esei ta keda impreshoná di esaki i p’esei hopi bia no por bisa presis di unda e ta bin.

Hopi orguyoso

Loke pa Giorgio ta nifiká gana Manhunt Ulanda ta hopi. Di e forma ei e ta haña ku e ta yega mas serka di su mes, no solamente di kuantu el a logra pero unda e ta pará i ku e ta mas fuerte ku tin bia e mes mester kere esei. E lo yega leu i ta kere ku e lo bai yega mas leu ainda i e ta dispuesto na traha mas duru pa esei i laga mundu sa ken e ta i kiko e ke logra ku e plataforma aki i ku su personalidat. Te ainda tur loke ku Giorgio a logra e ta sumamente orguyoso. E tin bon trabou, un dushi kas i ta gradesí di loke Dios a dun’é. Pero meskos ku kualke hende e tin ambishon i ta kurioso pa tin mas pero e ta gradesido pa loke e tin. Si e gana Manhunt Nederland el a bisa ku e ke kompartí e historia mas. E ta haña ku mas hende e papia kuné, mas hende e lo logra inspirá pa no solamente partisipá na elekshonnan di modelo pero dal e paso pa loke no ta stándart pero muchu mas. E ke ta e ehèmpel di kon ta hasi e kos imposibel, posibel.

Karakter

Loke Giorgio ta haña mas atraktivo di su mes ta su karakter. Hende ta drent’é fásil. Hende no fásilmente por bisa ku nan no gust’é òf no ta bai bon kuné. E tin un ‘energie matching’, manera el a bisa nos. I si e ripará un hende ku un personalidat alegre i habrí serka dje esaki ta drenta masha fásil mes.

No keda den un huki konfortabel

Tabata un poko difísil pa Giorgio a manda un mensahe pa tur e hendenan ku a sosten’é den su trayekto di bida. El a bisa di ta gradesido. E ta habrí ku loke e ta hasi pero e ta haña ku por mas di e hendenan dirèkt rònt di dje. E ta haña ku tin bia hende no sa kiko e ta hasi te ora nan mira esaki. E ta mira esaki serka su mayornan mes pasobra nan no tin media sosial i nan sa ku e ta hasi trabou di modelo pero mas aleu nan no ta envolví asina tantu te ora Giorgio mes informá nan di esaki. Pero nan ta duna sosten si aunke e ta haña e preguntanan krítiko di nan si realmente esei ta loke e ke. Pero Giorgio sa kiko e ke, e ke ta diferente i no keda den un huki konfortabel.

Un bunita historia

E ta haña su mes un hende habrí i ku ta duna hopi atenshon na su kultura. E ke nifiká algu pa komunidat , pa futuro i pa hóbennan pa nan por wak bèk riba dje. E no ke ta solamente pa e hendenan di Sürnam so, pero di tur tur hende. E ta orguyoso i ta sinti e konekshon ei. I tur hende ku e por a topa den su bida e tin bunita konekshon ku nan i e ta orguyoso di unda e ta bin. Nos tin un bunita historia i ke mustra esaki den tur loke e ta hasi.

Energia positivo

Giorgio tin un energia asina positivo i e mester sòru di pasa esaki over na nos hóbennan enpartikular. El a bisa ku e mes tabata hóben i p’esei e ke inspirá e hóbennan di e siguiente forma: “No laga niun hende nunka kita bo konfiansa propio. No laga niun hende kita algu di bo i ser orguyoso semper di unda bo ta bin. Nos tin un historia asina profundo i nos sa di unda nos a bin. Nos a bin di leu, pero nos ta dispuesto di hopi tambe i mester laga otro hende sa ku nos ta hendenan orguyoso, di nos pais, nos hendenan i tur loke nos ta hasi i loke nos a logra. I si nos sigui asina uní, nos lo logra masha hopi den e mundu akí. Laga wak ku nos ta poderoso”.