Rodion Davelaar, èks atleta olímpiko a habri AQUAfin Swim School na Orange City Merka. AQUAfin skol di landa a keda fundá na 2017 pa tambe èks atleta olímpiko Nim Shapira. E ta kolega ku a landa e mesun temporada ku Rodion den weganan olímpiko na 2008. Rodion ta hóben yu di Kòrsou ku a bai Merka ku Scholarship i awe e ta hasi nos nòmber aun mas grandi. Djasabra a kombersá ku Rodion ku for di Merka a konta nos di AQUAfin.
Scholarship
Rodion a konta ku el a bai Merka ku e edat hóben di 16 aña i na Jacksonfill a topa ku Nim Shapira. Nan dos ta amigu pa 16 aña kaba. Rodion a haña un scholarship di EOC pa e bai Merka pa mehorá i avansá su landamentu. Na e momentu ei hopi oportunidat a habri. El a bai skol sekundario na Jacksonfill Florida i einan el a hiba su landamentu na un nivel un tiki mas haltu. El a biba na skol mes e tempu ei i einan a haña chèns di konsentrá mas riba landamentu. Rodion a bisa ku e tabata rondoná di hendenan ku ambishon haltu pa ku landamentu. Di e hóbennan ku el a bai skol kuné, sigur 6 pa 7 a partisipá na weganan olímpiko na 2008. Esei ta mustra ku tabata un kaminda di hopi kompetensia den ekipo mes. Esei a pusha nan tur pa bai pa mas mihó.
Landa sin diploma
Na Kòrsou Rodion mes a kuminsá landa ku 6 aña. E tempu ei e ta kòrda ku e no a logra su diplomanan Ai B pero simplemente el a bai siña landa pasobra e ta gusta landa bou di awa. Pa haña diploma e mester a mustra ku e por hasi kosnan riba awa pa e haña su diploma. Rodion e tempu ei no a logra e diplomanan i banda di esei ku un Coach un tiki strèn na Sitoc Sirena, nan a logra sòru pa el a haña tòg su diplomanan. Einan Rodion ta kòrda ku e tabatin algun primu ku tambe ta landa, ku tabata hasi e ambiente masha dushi. Asina e landamentu a kuminsá komo algu leuk. Algun miembro di famia a sigui den otro deporte manda baseball miéntras ku e a skohe pa landa.
Mi soño no tabata weganan olímpiko
El a bisa ku e no a kuminsá landa ku e soño pa yega asina leu na weganan olímpiko. El a kuminsá landa komo algu leuk ku su amigunan, algu gezellig i despues el a ripará ku e ta basta bon i a keda subi nivel. Promé a kuminsá gana kampeonatonan na Kòrsou, despues a sigui ku kampeonato den Karibe, e éksitonan a sigui mas aleu den Amérika i rònt mundu. I asina el a keda subi. El a bisa algu mas realístiko ku el a yega olimpiada. Pa Rodion e tabata paso a paso. E ta un persona ku tabatin éksito tiki tiki i asina el a logra i no solamente focus ku ta olimpiada so e ke yega.
Oportunidat a presentá
Segun el a sigui konta nos, ora covid a dal aden e tabatin hopi tempu pa pensa di kiko pa hasi. Si e tin un pashon di kiko e ta hasiendo òf no. Rodion ta biba na Atlanta i einan a konosé su kasá Cassidy (pediatra) i su promé trabou el a haña einan tambe. El a sigui ku su master i a keda biba einan. Rodion a haña un bon trabou serka di kas i su kasá a haña trabou despues na Orlando. Ora e idea a presentá pa bai Orlando promé kos ku a pasa den Rodion su kabes ta serka di Kòrsou i einan ta mas kayente. Asina nan a bai biba Orlando i Rodion a logra keda ku su mesun trabou. For di 2018 e ta traha for di kas i na 2020, 2 aña despues el a kuminsá sinti su mes un tiki leu for di tur hende na trabou. Ora covid a dal aden ta remarkabel ku bo ta aun mas bo so. Asina Rodion tabata wak otro opshonnan i su amigu Nim a bis’é ku e tin 3 skol di landa kaba i a puntra Rodion si e ke tuma e frankisia na Orlando. Rodion i su kasá a pens’é bastante pasobra ounke ta frankisia, e ta un invershon basta grandi. Importante ta pa tin lès di landa henter aña. Na Kòrsou e ta fásil pero na Orlando ounke ta kalor, tin temporada ta bira poko friu i tambe sa tin tempu poko malu den oranan di atardi. I esaki ta trese kuné ku e lèsnan ta keda kanselá. Pero tabata importante pa tur mucha por haña un eksperensia di landa sin ku e lèsnan ta keda interumpí.
Seguridat den awa
Nan ta duna lès pa mucha for di 2 luna te mas grandi. Intenshon ta pa kuminsá duna lès na adultonan tambe. I ounke e wer hopi bia ta kayente tòg a pisina tin su awa kayente. E awa mester ta konfortabel pa e mucha ku ta bin tuma lès. Rodion a bisa ku na Merka ta duna lès di sobrebibí. Ta tira e mucha ku paña i tur kos den awa pa nan por siña drif riba nan lomba. Esei ta algu ku ta masha bon ya si e mucha kai den awa, e sa kiko e por hasi. Pero tòg e ta trese su trouma kuné pasobra tin mucha no ta wòri pero un kantidat grandi tòg despues di esei no ke bai den awa mas. I esei segun Rodion nan ta purba kambi’é den e lèsnan. Nan ta purba kita tur e trouma ku e mucha por tin. Mayoria hende ora nan bai laman ta haña e awa friu i ta pensa bon promé ku drenta e awa i un hende ku tin miedu di awa kaba ta hasi e situashon pió. I p’esei serka nan e awa ta 30 grado i e muchanan di algun luna ta sinti nan mes konfortabel ku e awa. Esei ta loke nan ta pone atenshon riba dje. Nan ta duna lès pa seguridat promé i di dos pa e mucha pasa un ratu kontentu den awa. E mucha ku bai den e programa na edat hopi chikí, por mira un diferensia segun nan ta krese. Ora e kuminsá for di chikí, e ta kla pa bula den awa i ta wak un bentaha mas lihé serka nan ku serka esnan ku mas edat.
Landamentu mester ta dushi
Rodion ta kere ku e mucha ku no por landa prinsipalmente na Kòrsou òf tambe na Florida kaminda tin hopi laman i yen pisina, e mucha mester por sinti ku e ta pasa dushi ora e por landa. Ora e no por landa no ta meskos ku ora e por landa den un ambiente. I esei ta nan focus. Nan ta duna mucha lès te ora nan siña tur e slagnan. I despues si nan ke bai mas avansá mester wak un tim pa forma parti di dje. Serka nan na AQUAfin ta konsentrá riba seguridat i pasa dushi den awa. Esei segun Rodion ta nan meta.
Un mucha ku kasi a hoga, awor ku éksito den landamentu
Nim Shapira ku 7 aña a kasi hoga pero el a perseverá, pasa over di e miedu ei i despues di 11 aña e ta den weganan olímpiko. Esei ta nifiká ku algu por troumatisá bu pa restu di bo bida òf bo por hasi algu kuné i mustra ku bida ta dal duru ratu ratu pero e no ke men ku bo mester stòp òf tin miedu pa semper. I Nim su mayornan a sòru pa e bai lèsnan di landa i tòg el a sigui padilanti i progresá. Nim a partisipá na 2 wega olímpiko i awor e tin 3 skol di landa. Esei ta mustra ku un mucha ku kasi a hoga tin asina tantu éksito den e mundu di landamentu.
Ripitishon ta importante den landamentu
Kon ta pa siña un mucha di 2 luna kiko e tin di hasi den laman? Rodion Davelaar a bisa Djasabra ku tin bia e mucha di 2 luna ta mas fásil ku esnan di kisas un aña i mei. Esun di 2 luna ta manera bo ta pone nan den nan baño, nan no ta pensa hopi, nan no tin miedu. Nan ta muchu mas fásil ku esnan di 3 aña ku ta un tiki mas difísil pasobra nan sa un tiki kaba. Ora bo sa bo ta pensa muchu riba dje pero si bo no sa di dje i den e kaso aki muchanan chikí nan ta, no ta un problema pa siña. Tin mucha no gusta baño i esnan ku ta gusta ta bai muchu mas fásil. E lèsnan e mucha ta siguié huntu ku su mayornan. I ora nan tin 3 aña, si nan por sinta tende, nan por bai lès ku e instruktornan i den grupo di máksimo 4 mucha. E lèsnan ta 30 minüt un bia pa siman ounke tin ke mas bia pa siman. Tur kos ta dependé kiko e mayornan ke, i kon lihé nan ke pa e mucha por landa. E ripitishon ta importante ku landamentu pasobra mas tantu bo hasié, mas bo siña. Ta bon pa bo bai hopi lès. Rodion a bisa ku nan no ke solamente siña e mucha landa pero nan ke siña e mucha kon e ta un landadó fuerte i ku si nan bai laman i si tin ola nan sa kon nan tin di manehá.
Tur mucha meresé landa
Ounke no tin un edat pa siña landa Rodion a enfatisá. E tin hopi kliente ku nesesidatnan spesial i nan tambe ta importante pa por siña landa. Pa nan tur mucha mester por siña landa. Sea e mucha ta hiper òf e ta ketu òf un man so òf mucha skiu, tur meresé landa. Nan ta fleksibel pa tur mucha por siña landa. Esei ta nan mishon, asina Rodion a enfatisá. I si e mucha ta grita den e pisina, nan ta bisa e mayornan pa no wòri ku esei pasobra si ta serka nan òf otro pisina e mucha lo grita tòg. Nan no ta wak si e mucha ta fèrfelu òf no pasobra despues di 4 pa 5 lès e mucha ta kuminsá bira kontentu i ke bin mas i kla pa siña landa. Ta nèt e miedu ei mester pasa riba dje i asina e mucha ta siña apresiá kon dushi landamentu por ta. Serka nan ta e skol di landa tin un espasio pa mayornan sinta i dor di glas por sinta wak e mucha. Esei pasobra tin bia e mucha ta wak e mayor e ke kore bai serka dje. I e barera ei nan ta sòru pa kita i ta djis laga pa e mayornan por wak kiko ta pasando. Nan ke pa tur mucha tin un bon eksperensia serka nan.
Sigui ekspandé
Rodion a bisa Djasabra ku su meta ta pa no habri un skol di landa so pero pa habri sigur 2 i p’esei e ta sigui traha riba dje. E proseso ta mustra kompleto awor aki pero tabata un kaminda di sigur dos aña i mei promé ku e por a habri un skol di landamentu. E ta spera ku aki 5 aña e tin su di dos skol di landamentu. I pa loke ta landamentu mes su meta ta pa mucha siña landa. El a bisa ku kisas aki 5 aña e no ta asina di focus riba su mes skol di landa pero kisas e por bai yuda otro pa habri nan propio skol di landa òf purba algu otro. Rodion tin 2 yu i e ke pasa tempu ku nan tambe i awor aki ku su skol di landa e ta sali kas hopi tempran i ta bèk te anochi. Hopi anochi kasi e no ta wak su yunan i esei ta importante pe. E ke pa su negoshi kana bon i generá sèn pero ta importante pa e dediká tempu na su famia meskos ku su mayornan a dediká tempu na dje tambe. Na Merka tin 10 mucha ta hoga pa dia, i hogamentu ta algu ku por prevení i p’esei e seguridat serka e mucha den laman for di chikí ta importante i alabes pa e sintié dushi.
