DEN HAAG – ‘Last of lust?’ ta e título di un buki kaminda kuarenta persona influyente di tur parti di Reino ta duna nan bista riba e nifikashon di e Statüt di Reino Hulandes ku ta eksistí setenta aña na 15 di desèmber 2024.
E redaktornan René Zwart i Glenn Thodé a skohe pa no limitá nan buki solamente na un enfoke di derecho konstitushonal, pero tambe pa inkluí un generashon nobo ku ta sigui e relashon nan den Reino.
Ta trata di outornan manera eks-minister presidente Don Martina, Maria Liberia-Peters, Etienne Ys, Suzy Camelia-Römer, Henny Eman i Mike Eman; parlamentarionan aktivo i anterior; vice-presidente di Konseho di Estado pa Reino, Thom de Graaf; aktivistanan ku ta luchando pa independensia, manera James Finies (Boneiru) i Rhoda Arrindell (Sint Maarten); Ombudsman Nashonal Reinier van Zutphen; e outor Sürnam Cynthia Mc Leod; eks-minister Jan Pronk, ku ta opiná ku e Antia Hulandes tabata mester sali for di Reino mesora ku Sürnam; i parlamentario Hulandes Peter van Haasen di partido PVV.
E buki di 232 páginanan ta habrí ku un poema di Walter Palm (Kòrsou). E introdukshon ta di Pieter van Vollenhoven, eks-presidente di Komishon di Relashonnan den Reino. Profesor historia kolonial i postkolonial, Gert Oostindie, ta sera ku su kontribushon.
E buki ta imprimí na un kantidat limitando, pero ta disponibel grátis na format ‘e-book’ òf pdf pa deskargá na www.dossierkoninkrijksrelaties.nl.
E buki ‘Last of lust?’ a wòrdu presentá djamars 10 di november na Nieuwspoort na Den Haag. Riba portret por mira gezaghebber Jonathan Johnson (Saba), Glenn Thodé, gezaghebber Alida Francis (Statia), René Zwart i gezaghebber John Soliano (Boneiru).
