SIUDAT DI MEXICO, AP.- E krísis polítiko na Bolivia a generá preokupashon den Latinoamérika kompleto, inkluyendo diferente persepshon tokante si e akontesimentunan por wòrdu konsiderá komo un golpe di Estado òf no.
Organisashon di Estadonan di Amérika a ninga di referí na esaki komo un golpe di estado den un komunikado di djaluna, rechasando e akontesimentunan komo “inkonstitushonal” den e pais andino i a proponé un reunion di paisnan miembro pa analisá e tema.
E aliadonan inkondishonal di Morales su gobièrnu, manera Venezuela, Cuba, México i Uruguay no a duda pa kalifiká e suseso komo un golpe di Estado. E presidente elekto di Argentina, Alberto Ferandez tambe ta kompartí e mesun sentimentu aki.
OEA pidi pa investigá e delitonan elektoral denunsia i Washington ya a pidi pa organisá un mishon pa supervisá e elekshon nobo na momentu ku e pais realisá esaki.
E gobièrnunan iskierdista a defendé Morales i a pidi pa garantisá su seguridat. Tabatin diferente embahada boliviano ku a registrá manifestashonnan na fabor di e eks promé presidente indígena di e pais.
Juan Guaidó, e hefe di Asamblea Nashonal venezolano i presidente interino di Venezuela a bisa ku e ta sinti un “aire di libertat i hustisia” pa e renunsia di Morales “kual su elekshon tabata produkto di froude elektoral”.
