BOGOTA (AFP).- E kansier di Colombia, Laura Sarabia, a renunsiá debí na “diferensianan di opinion” ku e presidente Gustavo Petro, meimei di un krísis den e promé gabinete di iskierda colombiano. Mientras tantu, mas ku 50 minister a pasa den e gabinete den un periodo di tres aña.
Den último lunanan, e relashon entre e kansier i e presidente a daña debí na vários diferensia di opinion, manera e entrada den e gobièrnu dje awor minister di Interior, Armando Benedetti, kende Sarabia a denunsiá plenamente pa supuesto hostigamentu. El a sigurá di no ta kompartí e “desishonnan” ku a tuma den último dianan i ku ta strob’é di “kompañá” e proyekto di iskierda, sin duna mas detaye.
Medionan lokal a publiká ku e renunsia tin di aber ku diferensia di opinion riba un kontrakt pa ekspedishon di pasport i pa a kita sierto outoridat riba puntonan ku e mandatario a disidí.
“No ta trata di kosnan chikitu ni tampoko ken tin rason. Ta trata dje rumbo ku, ku tur e afekto i rèspèt ku mi tin p’e, ya no ta posibel pa sigui traha”, segun e minister a skibi riba retnan sosial.
Sarabia tabata un figura klave den e kampaña presidensial di Petro den 2022. Despues dje viktoria, e tabata hefe di gabinete, despues a okupá dos funshon haltu den gobièrnu i den yanüari a bira minister di eksterior.
E kansier no ta e úniko den seno dje gobièrnu ku tin desakuerdo ku Benedetti, investigá pa korupshon i denunsiá pa violashon di género, kende tin un pleitu ku e vise presidente Francia Marquez i ku su yegada a provoká salida for di gobièrnu di vários minister.
INTERNASHONAL 1 – LAURA SARABIA
Presidente kolombiano Gustavo Petro huntu ku e kansier Laura Sarabia ku a bira e di tantísimo mandatario kolombiano ku ta renunsiá den último dos pa tres aña.
