Le Prestige; kreatividat, elegansia i konsistensia a marka historia

Hensley Roberto

Awe nos ta papia di Karnaval, i nos ta yega den e último fase di un temporada yen di koló, ritmo i energia. Mayan ta Gran Marcha, despues di lunanan duru di trabou duru. Dimes, ora bo tende e nòmber Hensley Roberto i su grupo Le Prestige, bo mes por visualisá e trahenan. Su trahenan tabata detayá, un perfekshon, un presensia fuerte, ku a buta nan a sobresalí for di promé aña ku nan a partisipá. Ora nan tabata pasa, e públiko tabata sinti e impakto, no solamente den bista di e trahe i koreografia, pero den e manera ku nan tabata honrá nos kultura i tradishon, mientras ku nan tabata tene kreatividat na un nivel haltu. Den e último fase aki, ku Gran Marcha na porta, un kos ta sigur: Le Prestige lo keda marka historia pa hopi aña mas.

Sinku aña di historia, sinku aña di Karnaval
Hensley ta konta ku Le Prestige a kuminsá ofisialmente riba 20 di aprel 2009, pero nan a partisipá pa promé bia den Karnaval na 2010. “Nos a bisa ku nos lo partisipá tres aña,” e ta rekordá. “Pero na momentu ku nos a gana, niun hende no tabata ke pa nos stòp ku e grupo.” E entusiasmo di e públiko i di e miembronan mes a hasi ku nan disidí di sigui un aña mas. Na di dos aña si nan a tuma e desishon i a sera e kapítulo.

Hensley ta bisa ku e ta orguyoso di su mes i di su tim: nan a bin ku algu nobo, un ambiente sano, trahe bunita i un organisashon sólido. Tur kos a kana segun regla i metanan stipulá. Sinembargo, nunka e no lo a pensa ku Le Prestige lo logra un rèkert di gana konsekutivamente durante sinku aña tras di otro, inkluso e promé premio di road piece. “Ora mi a lanta e grupo, mi no a bai ku idea di gana,” Hensley ta splika. “Tabata tin gruponan grandi ku a establesé nan mes kaba. Mi no a kere na niun momentu ku nos por a gana nan.”

E ta bisa ku e ta un miembro bieu di grupo Sorpresa, Jump X i Tapa Solo, e último grupo kaminda el a kontribuí i yuda desaroyá ideanan kreativo. E eksperensia ei a forma su karakter artístiko i a duna e konfiansa pa opta pa lanta su propio grupo. Le Prestige, mas ku un grupo di Karnaval, a bira un testimonio di kreatividat, pashon, disiplina i vishon.

Sinku aña di Le Prestige

Le Prestige ta konosí pa su road piece ekstrabagante. Tur detaye ta keda pensá pa yega na e totalidat di e grupo: di konsepto te koló, di koreografia te ambiente interno.

Kreatividat ta kuminsá na Hensley. Un di e idea mas memorabel a bini di su señora, ku un dia a bisa: “Dikon nos no ta bin ku perfume?” E frase simpel ei a krea historia. E di tres aña, e tópiko di Le Prestige tabata basá riba perfume, un konsepto elegante ku a laga un marka riba Karnaval di Kòrsou.

Normalmente, ora Karnaval kaba, e grupo ta tuma un pousa chikitu. Na luna di aprel nan ta kuminsá ku seshonnan di brainstorm. Hensley ta habrí pa idea i konseho, pero hopi bia e tim ta laga e responsabilidat kreativo prinsipalmente den su man. “Mi no por pinta bon,” e ta bisa ku humildat, “pero den mi mente mi sa eksaktamente kiko mi ke.” Tin momentu ku e ta traha riba pòpchi pa visualisá kon e paña mester bira, buskando un forma pa e tradusí e imágen mental den realidat.

Le Prestige a skohe konsientemente pa no bai ku banda

Den su trayekto, Le Prestige a hasi desishonnan importante. Nan a opta pa no sigui ku banda, ya ku e ensayonan no tabata semper aliniá ku e nivel ku nan tabata buska. Miembronan a ekspresá nan mal kontentu, di kual Le Prestige mester a komuniká ku e banda pa asina nan drecha nan repertorio. Despues di evaluashon, e grupo a skohe pa traha ku DJ, un desishon ku a haña sosten di mayoria otro grupo.

Semper tabata tin un diálogo ku e DJ: e dies tumbanan ku tabata den tòp i algun road fire pa subi e energia durante ruta. Pero segun Hensley, e parti musikal a kambia bastante. “Awor bo ta tende hopi road fire i masha tiki Tumba,” e ta remarká, señalando un evolushon den e ritmo di Karnaval.

Le Prestige no tabata un grupo grandi; tabata un grupo di máksimo 125 hende, i nan a logra mantené e kompakto durante e sinku añanan ku nan tabata partisipá. E miembronan ku a bai den e promé aña a keda konsekutivamente tur e añanan ku Le Prestige, ku a trese e grupo na un nivel i na un posishon di liderato den Karnaval.

E último bia ku Le Prestige a partisipá tabata na 2014, ya 12 aña pasá. Pero nan legado ta sigui biba den memoria di Karnaval: un periodo kaminda kreatividat, elegansia i konsistensia a marka historia di e festival mas grandi di nos isla.

Desaroyo den e 12 añanan aki

Si nos bai bèk na e sinku añanan ku Le Prestige a partisipá, Karnaval tabata den su gloria. E tabata un époka di kompetensia, kaminda tur grupo tabata bini fuerte i tin bia bo no por a bisa ku siguridat ken lo bai ku e premio. E nivel tabata haltu, i tabata krea basta emoshon.

Hensley ta menshoná ku na e momentu ei tabata tin dos grupo super potente ku e  tabata tin hopi rèspèt pa nan. Nan presensia riba ruta tabata dominante, i e echo ku Le Prestige a logra gana den un ambiente asina kompetitivo ta duna mas peso na e logro. “Nos no a gana fásil,” e ta enfatisá.

Ku tempu, tur kos a kambia. Hensley a opservá ku algun grupo a bira mas simpel, i ku tiki kreatividat original. Nos kultura, e ta bisa, ta hopi kreativo. Kòrsou tin un identidat propio, un meskla di historia, ritmo i koló ku no niun otro pais no por igualá. E ta mira ku nos tin e tendensia pa imitá otro paisnan, manera Brasil. “Si bo wak, nos trahenan a bira hopi mas sèksi i sunú,” e ta remarká, ku un tono di reflekshon. E no ta kontra trahenan sèksi, Karnaval semper tabata tin un elemento di selebrashon di kurpa i libertat, pero segun e, nos mester wak pa nos no pèrdè nos propio kreatividat. “Nos no por laga nos kreatividat bai,” Hensley ta bisa. “Si nos sigui imitá, nos ta bira un kopia di un otro pais.” Pa e, e reto ta keda na nos identidat kultural, kreando trahe i konsepto ku ta reflehá nos historia.

Alabes, e ta pone énfasis pa gruponan den futuro: inklusividat. No ta tur hende por pas den tur estilo di paña. Un grupo mester pensa riba diferente tipo di kurpa, diferente edat i diferente personalidat. Karnaval ta pa tur hende. Den su bista, e siguiente etapa di Karnaval di Kòrsou no mester ta mas grandi ni mas sunú, sino mas konsiente, fiel na nos mes, mas kreativo den nos propio idioma visual. Asina so nos por sigui evolushoná sin pèrdè e esensia.

Karnaval tin e nesesidat di atenshon

Hensley ta bisa ku, apesar di tur e desaroyonan i e logronan ku grupo manera Le Prestige a logra, Karnaval mes no ta risibí e atenshon nesesario. Segun e, mester di mas promo, mas visibilidat, i un konsientisashon, pa krea i hasi e Karnaval di nos bèk.

Den komparashon ku Tumba, e diferensia ta notabel. “Nos ta haña sierto tumba henter aña, pero den temporada di Karnaval bo no ta skucha e den e Marcha. Bo ta haña mas kantika di afó ku e esfuerso di nos artistanan lokal,” Hensley ta enfatisá. E ta tuma un ehèmpel: Le Prestige, ku a gana sinku aña konsekutivamente, a bai Sint Maarten i Santo Domingo, i nan a bai ku CDnan di tumbanan.

E ta un logro, pero tabata tin un desafio: pa por toka e tumbanan nan, nan mester a pone hopi preshon riba e DJ. Ora e tumba a zona, nan tabata biba. Pa Hensley, esaki ta lamentabel: si nos no preservá nos tumba den Karnaval, un parti importante di nos kultura lo por bai pèrdí, i nos no lo tin un kos di nos mes ku por konta nos historia. Hensley ta enfatisá ku e nesesidat pa atenshon ta pa sigurá ku nos kultura i nos músika, nos tumba i nos kreatividat teip a hopi tempu mas.

No paden sino pafó den banda

Hensley ta atmití ku e sintimentu ta miksto. Dor di su trabou den su bida personal, e no por haña liber tur aña pa partisipá. Ora e ta wak Marcha e ta pensa: “Mare, mi por tabata paden.” Al mismo momentu, e ta konsiente ku “ta okay asina aki.” Na e momentu ku el a stòp, e desishon a bin pa e por a dediká mas tempu na famia. E ta remarká ku e preparashon pa Karnaval ta un responsabilidat grandi. E tabata tin un direktiva fuerte ku a sostené e grupo, i for di dezèmber te Karnaval nan tabata traha tur wikènt pa logra nan meta i pa lusi den e kayanan di Kòrsou.

Karnaval ta un evento kostoso, i for di 2009 te awor, e gastu a bira hopi mas haltu. Antes, e diferensia tabata ku bo tabata uni ku 5 otro grupo pa hasi fundraising, ku tabata baha e preshon i yuda e partisipantenan. Hensley ta enfatisá ku komèrsio mester yuda, paso nan ta biba hopi dor di e temporada di Karnaval, dor ku hende ta kumpra paña pa bai wak Tumba, Jump In, i Karnaval. Sin e aportashon aki, e kreatividat i e metanan di grupo por keda limitá. Pa Karnaval por keda un evento di nivel, mester tin e balansa entre pashon, komunidat i e apoyo ekonómiko.

Futuro di Karnaval

Desaroyo ta importante pa e progresonan di Karnaval. Nos tin hopi hende ku kreatividat, ku tin hopi bon ehèmpel ku nos por usa, ku materialnan masha simpel nos por usa nos man i krea kos ku no ta hopi kostoso. Pa nos Karnaval por sobrebibí, nos mester mantené e algu di nos, kosnan ku nos mes a krea, ku ta duna nos identidat i originalidat. Hensley ta bisa ku den futuro, e huradonan lo mester tene na kuenta ku grupo nan ku ta traha nan mes kosnan i no simplemente kos kumprá.

Hensley su soño ta pa den futuro por laga kada miembro bira individual den su ekspreshon, pa nan haña nan propio estilo. E ta konsiente ku esaki ta kostoso, pero e ta spera ku dor di sponsor i aportashon finansiero, e por hasi e realidat un dia.

“Pa Karnaval por sigui keda original, kreatividat, pashon i aporte lo mester bai man den man.”